Astanada jańa aıaldamalar ornatyla bastady
ASTANA. QazAqparat - Saryarqa dańǵyly men Kenesary kóshesiniń qıylysynda jańa úlgidegi jyly aıaldama ornatyldy dep xabarlaıdy QazAqparat tilshisi.
Jańa aıaldamanyń birneshe artyqshylyǵy bar. Burynǵy qyzyl tústi bir tektes aıaldamalardyń syrtqy jaǵynda jolaýshylar otyratyn jer bolmasa, jańa aıaldamanyń jabyq jerinde de, ashyq jerinde de otyratyn jer bar. Esigi kapsýla sııaqty avtomatty túrde ashylady. Biraq ázirshe ol esik istemeı tur. Іshki jaǵynda arnaıy tereze ornatylǵan. Ol arqyly saýda-sattyq júrgiziledi. Al syrtta uıaly telefondardy zarıadtaıtyn jer, sondaı-aq Wi-Fi jelisi bar. Beınebaqylaý júıesi de ornatylǵan. Biraq atalǵan qyzmetter ázirshe istemeı tur.
«Men bul aıaldamany jaqynda ǵana kórdim. Jaqsy jasapty. Esigi de avtomatty túrde ashylady eken. Ol da jaqsy. Áıtpese, burynǵy aıaldamalardyń esikteri jıi synady. Qatty aıaz kezinde jabylmaı qalady. Avtomatty túrde istese, ondaı problemalar bolmaıtyn shyǵar. Endi, adamdardyń ózderi syndyrmasa boldy», - deıdi qala turǵyny Bıbigúl Ábilqadyrova.
Aıta keteıik, buǵan deıin Astana qalasynyń ákimidigi jyly aıaldamalardyń jańa úlgisin qarastyryp jatqany týraly aıtylǵan bolatyn. Ol aıaldamalar jeke ınvestorlardyń esebinen salynady. Jospar boıynsha kásipker aıaldamany ornatady da, birneshe jyldyń ishinde saýda orny men syrtqy jarnama arqyly óz shyǵyndaryn aqtaıdy. Aıaldamadaǵy tazalyqqa da ózi jaýapty bolady. Burynǵy qyzyl aıaldamalar bıýdjettiń esebinen salynǵan edi. Onyń baǵasyna qatysty talaı ret daý-damaı shyqqany belgili.
