Astanada Jambyl oblysynyń mádenı kúnderi bastaldy
ASTANA. QazAqparat - Eki aı buryn Áýlıeata topyraǵynan elordaǵa bet alǵan «Kóne Tarazdan asqaq Astanaǵa tartý» kerýeni Astanaǵa jetip, Jambyl oblysynyń mádenı kúnderiniń shymyldyǵyn ashty, dep habarlaıdy «QazAqparat» HAA tilshisi.
Saltanatty kerýen elordaǵa 26-30 shildede ótetin Astanadaǵy Jambyl oblysynyń mádenı kúnderi qarsańynda kelip otyr. Olardy «Han Shatyr» oıyn-saýyq ortalyǵy mańyndaǵy saıabaqta Astana qalasynyń ákimi Áset Isekeshev, Jambyl oblysynyń ákimi Kárim Kókirekbaev jáne Jambyl óńirinen shyqqan zııaly qaýym ókilderi kútip aldy.
El ishinde «Ǵashyqtar saıabaǵy» atalyp ketken bul oryn naǵyz ortaǵasyrlyq bazarǵa aınalyp shyǵa keldi. Munda «Kóne Taraz álemi» tarıhı-mádenı ekspozıtsııalyq kesheni ashyldy jáne kıiz úıler tigilip, Jambyl oblysy aýmaǵynan tabylǵan kóne jádigerler qoıyldy. Qoldan jasalǵan áshekeı buıymdar, mýzykalyq aspaptar, jemis-jıdekter men kókónister satylymǵa shyǵaryldy.
Aısha Bıbi men Qarahan, nemeresine ertegi aıtyp otyrǵan áje jáne qus ushyryp, tazy júgirtken ańshylardyń sáni men saltanaty jarasqan kerýeni Astana turǵyndary men qonaqtaryna umytylmas áser syılady. Olar shalǵaıdaǵy Taraz qalasynan Astanaǵa eki aı boıy jol júrip kelgen edi.
«Bul bir esten ketpeıtin erekshe sapar boldy. Bizdiń kerýen EKSPO-2017 halyqaralyq kórmesine arnalady. Mamyr aıynda Tarazdan Astanaǵa saparǵa attandyq, bizdi árbir aýyl qýanyshpen qarsy aldy. Kútken úmitimiz de 100% aqtaldy. Barlyq Qazaqstan halqyn EKSPO kórmesiniń ótkizilýimen quttyqtaımyn. Sondaı aýqymdy sharaǵa úles qosyp, kerýenmen Astanaǵa kelýim de - men úshin úlken mártebe. Aspanymyz búgingideı ashyq, jaryq bolsyn», - deıdi kerýen qatysýshysy, aq kımeshekti ájeı - Tamara Ábdikárimova.
Kerýen basshysy Nuraly Abdýllaev alǵa qoıǵan maqsattarynyń oryndalǵanyn, Astanaǵa erekshe tartý jasaǵandaryn atap ótti.
Onyń aıtýynsha, kerýen qatysýshylary Tarazǵa kólikpen qaıtady jáne túıelerge de arnaıy kólik qarastyrylǵan.
Aıta keteıik, EKSPO-2017 kórmesi aıasynda 26-30 shilde aralyǵynda Astanadaǵy Jambyl oblysynyń mádenı kúnderi ótedi. Bul kúnderi elordalyq turǵyndar men qonaqtar oblystyq fılarmonııa ujymynyń «Áýlıeatadan án shashý» baǵdarlamasyn, oblystyq qazaq dramalyq teatrynyń «Qyz Jibek» saýnd-tregin, A.Bekbosynnyń «Domalaq ene», S.Balǵabaevtyń «Eń jaqsy erkek» spektaklderin, «Alataý» folklorlyq ansambliniń «Ǵasyrlar áýeni» kontsertin jáne D.Tańatarov, Q.Nurtas, I.Rasylhan syndy tanymal ánshilerdiń qatysýymen ótetin «Bir áýen, bir óleń» keshin tamashalaı alady. Mádenı sharalardyń kópshiligi «Han Shatyr» saýda oıyn-saýyq ortalyǵy mańyndaǵy «Ǵashyqtar saıabaǵynda» ótedi.
Sonymen birge, 28-30 shilde kúnderi jambyldyqtar «Qazaqstan» sport kesheni aýmaǵynda aýylsharýashylyq jármeńkesin ótkizip, eorda turǵyndary men qonaqtaryna 245 tonna ekologııalyq taza, joǵary sapaly azyq-túlik ónimderin usynatyn bolady.
