Astanada jalpyqalalyq senbilikte 4 myńnan astam kóshet otyrǵyzylady
ASTANA. 18 qyrkúıek. QazAqparat - Qazaqstan Respýblıkasy Prezıdentiniń Astana qalasyn damytý jónindegi tapsyrmasyna sáıkes, 10 qyrkúıek-10 qazan aralyǵynda elordada ekologııalyq aılyq ótýde.
Aılyq aıasynda 21 qyrkúıekte «Biz taza qala úshin» qalany sanıtarlyq tazartý, kógaldandyrý jáne abattandyrý boıynsha jalpyqalalyq senbilik uıymdastyrylady. Bul týraly astana.kz saıtyna Astana qalasy ákimdiginiń ómirdi qamtý jáne ınfraqurylym bóliminen habarlady.
Jalpyqalalyq ekologııalyq senbilik aıasynda qalalyq jáne respýblıkalyq uıymdar «Astana-Zelenstroı» AQ birlesip kóshetter otyrǵyzady.
Almaty aýdanynda Aqjol jáne №14 kóshelerdiń qıylysynda qaý japyraqty shegirshin, súmbil terek, qyzyl tal, úıeńki men jıde aǵashynyń 1848 kósheti otyrǵyzylmaq.
Saryarqa aýdanynda Tilendıev dańǵyly boıynsha Prıdorojnyı kóshesinen bastap soltústik-batys aınalma jolyna deıin jáne Saryarqa-Abaı kósheleriniń qıylysyndaǵy saıabaqta 646 aǵash otyrǵyzý kózdelgen. Munda terek, úıeńki, qaraǵaı, balqaraǵaı otyrǵyzylady.
Esil aýdanynda 1545 kóshet otyrǵyzylmaq: Turan dańǵyly №31 kósheden «Astana juldyzy» monýmentine deıin usaq japyraqty shegirshin, al Botanıkalyq baq aýdanyna qaraǵaı, arsha, qaıyń, sheten jáne zerek aǵashtary otyrǵyzylady.
Jalpyqalalyq senbilik aıasynda alýan túrli aǵashtan 4039 túp otyrǵyzý josparlanǵan, qazirgi ýaqytta 3639 oryn belgilendi. Qalalyq jáne respýblıkalyq uıymdar qatysatyn is-sharalardy ótkizý kezinde barlyq nysandarda «Astana-Zelenstroı» AQ mamandary men qyzmetkerleri bekitiledi.
«Ákimdiktiń ótinishimen aǵashty-butaly ósimdikterdiń 1500 jýyq kósheti, ınerttik materıal, 980 tekshe metrge jýyq topyraq, kem degende 350 m3 qum jáne qoqys jınaý úshin 4800-den astam polıetılen qap daıyndalady. Sonymen qatar, júk tıegish kólikter men jınalǵan qoqysty tıeıtin brıgada usynylady. Qala basshysynyń tapsyrma-josparyna sáıkes, Energetıka, kólik jáne qurylys basqarmasynan lastanǵan jerlerdi tazalaý jáne ony polıgonǵa ýaqytyly kómý úshin 30 júk tıeýish jáne 90 úlken júk tasymaldaıtyn mashına bólinedi. Budan basqa, kommýnaldyq, qurylys jáne qaladaǵy basqa da kásiporyndardyń mehanıkalandyrylǵan tehnıkasy tolyq tartylady»,- delingen taratylǵan aqparatta.
Ekologııalyq aılyq aıasynda gúlzárlardy tazalaý, park pen kóshelerdi, skverlerdi jınaý josparlanǵan. Qalanyń úsh aýdanynan 1000 tekshe metrge jýyq, atap aıtqanda, Almaty aýdany boıynsha 437 tekshe metr, Saryarqa aýdanynda 238 tekshe metr jáne Esil aýdanynda 313 tekshe metr qoqys shyǵarylmaq.
Senbilik pen ekologııalyq aılyqty ótkizýdi qalany kórkeıtý, kógaldandyrý jáne sanıtarlyq tazartý, abattandyrý boıynsha jumystardy júrgizýdi baqylaıtyn jáne tikeleı jaýapty shahar basshysy bekitken qalalyq shtab, aýdan ákimdikteri, qalalyq departamentter men basqarmalardyń basshylary qamtamasyz etedi.
Jalpyqalalyq senbilikterdiń negizgi maqsaty - qoǵam nazaryn qala kóshelerinde tazalyq saqtaýǵa aýdarý jáne ekologııalyq mádenıetti qalyptastyrý, óskeleń urpaqqa tárbıe berý bolyp tabylady. Týǵan qalasynyń kósheleri men aýlalaryn abattandyrýǵa nıet bildirgen qala turǵyndary men uıym ókilderi qatysa alady.
