Astanada jalpyqalalyq senbilik ótedi
ASTANA. 9 qyrkúıek. QazAqparat /Gúlmıra Alıakparova/ - Qyrkúıek aıynyń aldaǵy 24-i kúni Astana qalasynda «Biz - taza qala úshin!» uranymen jalpyqalalyq senbilik ótedi. Bul týraly qala ákimdiginiń baspasóz qyzmetinen habarlady.
Jalpyqalalyq senbilik 2011 jyldyń 10 qyrkúıegi men 10 qazany aralyǵynda Astanada ótkiziletin ekologııalyq aılyq aıasynda ótedi.
Jumystardy tıimdi úılestirý úshin qala ákiminiń orynbasary Vasılıı Krylovtyń basshylyǵy etýimen ekologııalyq aılyqty, kommýnaldyq jáne jalpyqalalyq senbilikterdi ótkizý jónindegi arnaıy Qalalyq shtab quryldy.
Aldyn-ala málimetter boıynsha, jalpyqalalyq senbilikke 80 myńnan astam turǵyn, 4500 kásiporyn, uıym jáne mekemelerdiń jumyskerleri qatysady. Bul kúni 3,5 myń túp aǵash egý kózdelip otyr. Jumystarǵa 300-den astam tehnıka jumyldyrylatyn bolady.
Bir aıdyń ishinde 177 lastanǵan oryn men jańadan paıda bolǵan qoqys oryndary tazartylyp, 693 tekshe metr qoqym-soqym qala syrtyna shyǵarylady.
Qalany abattandyrý jáne tazartý boıynsha negizgi jumystardy «Astana-Jasylqurylys» AQ, «Astana Tazalyq» AQ, «Astana Qalalyq kommýnaldyq sharýashylyǵy» JShS, «Astana tazartý» JShS, «Astana -Jylýtranzıt» AQ, «Astana REK» AQ, «Astana sý arnasy» QKK, «Astana ormany» JShS, «Qalalyq jaryq» QKK, «Elorda Jarnama» JShS, «Tehservıs Astana NS» JShS jáne taǵy basqa da qalalyq qyzmetter atqaratyn bolady.
Astana qalasynyń ákimdigi qala turǵyndaryn árbir úıdiń aýlasy men kóshesinde júrgiziletin jalpyqalalyq senbilikke belsendi atsalysýǵa shaqyrady.
