Astanada jalǵan sertıfıkat satyp, 24 adamdy aldaǵan jattyqtyrýshy sottaldy

ASTANA. KAZINFORM — Buryn sport klýbtarynda jattyqtyrýshy bolyp jumys istegen azamat kóptiń senimine kirip, zańdyq kúshi joq, ózi daıyndaǵan jyldyq abonement túrindegi jalǵan syılyq sertıfıkattaryn satyp kelgen. Bul týraly Astana qalasy prokýratýrasy málim etti. 

— Ol bul sertıfıkattardy naryqtaǵy baǵadan áldeqaıda arzan — 150 myń teńgege usynyp, olardyń túpnusqalyǵyna sendirip, azamattardy shatastyrǵan. Shyn máninde mundaı abonementterdiń quny shamamen 700 myń teńge, — delingen habarlamada.

Jábirlenýshiler, fıtnes-ortalyqqa kelgende satyp alǵan sertıfıkattarynyń jaramsyz ekenin bilip, quqyq qorǵaý organdaryna júginýge májbúr bolǵan. 

— Atalǵan qylmystyq áreketten 24 adam japa shekken, keltirilgen jalpy materıaldyq zalal 3,5 mln teńgeden asqan. Tergeý amaldary aıaqtalǵannan keıin qylmystyq is máni boıynsha qaraý úshin sotqa joldandy, — dep habarlady prokýratýradan. 

Jábirlenýshilerge keltirilgen zalal tolyq ótelip, aýyrlatatyn mán-jaılar bolmaýyna baılanysty, sot úkimimen alaıaqqa 3 jyl merzimge probatsııalyq baqylaý belgileýmen bostandyǵyn shekteý jazasy taǵaıyndaldy. 

Aıta ketý kerek, syılyq sertıfıkattary men kartalar arqyly jasalatyn alaıaqtyq faktileri búgingi tańda jıilep ketti. Ásirese onlaın-satylymdar men servısterdiń keńinen taralýy mundaı qylmystardyń qaýpin arttyryp otyr.  

— Osyǵan baılanysty, mundaı qyzmetterdi tek resmı satýshylar arqyly satyp alý qajet. Áıtpese, alaıaqtardyń qurbany bolý qaýpi joǵary. Astana qalasynyń prokýratýrasy bóten múlikti jymqyrý ne bóten múlikke quqyqty aldaý nemese senimdi teris paıdalaný arqyly ıelený áreketteri úshin zańnamada múlki tárkilene otyryp, 10 jylǵa deıin bas bostandyǵynan aıyrý jazasy kózdelgenin eskertedi, — delingen habarlamada.

Buǵan deıin habarlanǵandaı, Bas prokýratýra alaıaqtardy anyqtaý jumystary kúsheıtilgenin habarlaǵan bolatyn.