Astanada jalǵa beriletin páterlerdiń baǵasy tómendeýi múmkin
ASTANA. 28 naýryz. QazAqparat - Qazaqstandyq jyljymaıtyn múlik portalynyń habarlaýynsha, 2012 jyldyń birinshi toqsanynda turǵyn úı naryǵyndaǵy jalǵa berý stavkalary kórsetkishiniń aıtarlyqtaı tómendegeni tirkeldi.
Máselen, elordada páterdi jaldaý atalǵan kezeńde ortasha alǵanda aıyna 715 dollarǵa teń bolǵan. Sonymen birge, jalǵa usynylǵan páterler sany 2011 jyldyń 4-inshi toqsanymen salystyrǵanda 49 paıyzǵa artqan. Bunymen qosa, «qymbat» sanalatyn úılerdi jaldaý baǵasy 34,2 paıyzǵa, al «arzan» úıler baǵasy 17,9 paıyzǵa tómendegen. Páterlerdiń negizgi bóligi - 83 paıyzy oń jaǵalaýǵa tıesili bolyp tabylady. Al sol jaǵalaýdaǵy usynys kórsetkishi 17 paıyzǵa deıin tómendegen.
Sonymen qatar, málimetterge qaraǵanda úı ıelerimen birge turý úshin nemese birlese jaldaý úshin usynylǵan páter bólmeleri jekelegen páterler sanynan asyp túsken.
Onymen birge, aýmaǵy úlken páterlerge qatysty usynystardyń 2 paıyzǵa tómendegeni baıqalady. Jalpy 2011 jyldyń 4-inshi toqsanymen salystyrǵanda barlyq formattaǵy páterlerge usynystar sany tómendegen. Al qurylysy jańa bitken úılerdegi páterlerdi jalǵa berýge usynylǵandar sany sol jaǵalaýda 62 paıyzdy, al oń jaǵalaýdyń aýdandarynda 38 paıyzdy qurady.
www.kn.kz ınternet-resýrsynyń jalǵa berý stavkalary baspana sanatyna qaraı bylaısha jiktelgen: ekonom klass aıyna - 513 dollar, bıznes klass - 751 dollar, elıtaly klass - 1 myń 147 dollar.
Portal sarapshylarynyń paıymynsha, aldaǵy ýaqytta turǵyn úı naryǵynda jalǵa berý úshin usynylatyn páterler sany arta túsedi. Soǵan oraı jalǵa berýdiń ortasha stavkalary tómendeýge beıim. Budan bólek «qymbat» jáne «arzan» úıler arasyndaǵy baǵa aıyrmashylyǵy tómendegeni baıqalyp, jalǵa beriletin úılerdiń tabysy da naryqtyń barlyq segmentinde qysqarǵan. Jaqyn perspektıvada jalǵa berý stavkalary 5-10 paıyz shamasyna qysqaryp, aıyna ortasha alǵanda 700 dollarǵa deıin tómendeýi boljanady.
