Astanada «Jahandyq Jibek joly» forýmy ótedi
BEIJІŃ. QazAqparat - 2018 jyldyń 3-4 shildesinde Astanada «Jahandyq Jibek joly» atty forým ótedi. Onyń aıasynda Jibek jolynyń boıynda ornalasqan elderdegi qalalar basshylarynyń forýmy ótedi. Bul týraly «G-Global halyqaralyq hatshylyǵynyń» jetekshisi Serik Nógerbekov málim etti, dep habarlaıdy QazAqparat.
«Jahandyq Jibek joly» forýmyn Astanada 3-4 shildede ótkizý týraly sheshim qabyldandy. Atalmysh jıyn «Bir beldeý, bir baǵyt» bastamasynyń 5 jyldyǵyna jáne Qazaqstan astanasynyń 20 jyldyǵyna arnalady. Osy múmkindikti paıdalana otyryp, Sizderdi atalmysh sharaǵa qatysýǵa shaqyramyn»,-dedi ol Qazaqstannyń Qytaıdaǵy elshiliginde ótken «Qazaqstan men Qytaı ózara yntymaqtastyqtyń jańa dáýirinde» atty dóńgelek ústel otyrysynda.
Ol Elbasy Nursultan Nazarbaevtyń 2017 jyldyń mamyrynda «Bir beldeý, bir baǵyt» strategııasynyń aıasynda ótken halyqaralyq yntymaqtastyq jónindegi joǵary forýmy barysynda Jibek joly halyqaralyq ǵylym akademııasyn salý máselesin kótergendigin eske saldy.
«Bul bastama qazirdiń ózinde júzege asyrylyp úlgerdi. Biz QHR, RF men ózge de 30 memleket ókilderine qoldaýlary úshin alǵys bildiremiz. Biz osy isti jalǵastyra otyryp, Jibek joly boıynda túrli sala ókilderiniń yntymaqtastyǵyn qalyptastyrýdy usynamyz. Bul rette biz ásirese mádenıet, medıtsına, úkimettik emes uıymdar sııaqty qoǵamdyq qatynastyń ózge de baǵyttaryn atar edik. Eger Sizder bul jobany qoldaıtyn bolsańyzdar, ony «Jahandyq Jibek joly» dep ataýǵa bolar edi. Osy maqsatta úlken forým ótkizgeli otyrmyz. Onyń qorytyndysy boıynsha biz Jibek joly boıyndaǵy elderdiń qalalary basshylarynyń klýbyn quratyn bolamyz»,-dedi S.Nógerbekov.
Onyń sózinshe, «Jahandyq Jibek joly» forýmy bolashaqta Qytaıdyń Sıan provıntsııasyndaǵy Shensı qalasy men Astanada ótetin bolady.
