Astanada jahandyq telemedıtsınalyq júıe ashylady
ASTANA. 13 shilde. QazAqparat - Respýblıkalyq jedel medıtsınalyq járdem ǵylymı ortalyǵy bazasynda jahandyq telemedıtsına júıesi ashylady,
dep habarlady ortalyq basshysy Kennet Álibek pm.kz saıtyna bergen suhbatynda.
«Ústimizdegi jyldyń ІІІ toqsanynda biz jahandyq telemedıtsına júıesin ashamyz. Osynyń arqasynda biz osy jyldyń ózinde-aq Pıttsbýrg ýnıversıteti onkologııalyq ortalyǵynyń múmkindikterin paıdalanyp, patsıentterge keńes bere alamyz», - dedi K.Álibek.
Sonymen qatar, ol qazirgi kezde Astanada onkologııalyq ortalyq qurý jónindegi jumystar júrgizilip jatqanyn habarlady. «Mundaı ortalyq qurý - bul tek qurylys máselesi ǵana emes, bul qazirgi jumys istep turǵan klınıkalardyń múmkindikterin keńeıtý de, biz búginde osy maqsatta eńbek etýdemiz», - dedi K.Álibek.
Osylaısha, bıyl ortalyq qurýdyń joba aldyndaǵy uıymdastyrý jumystary bastalyp ta ketti. Búginde Ulttyq medıtsınalyq holdıngtiń barlyq ortalyqtary keńeıtýge baılanysty óz múmkindikterin saralap, negizi ortalyqtyń qurylys jumysy aıaqtalmaı turyp-aq, jumysty bastap ketýdi oılastyrýda. «Biz óz ortalyǵymyzda taqaý arada 60 tósektik onkologııalyq bólim ashýdy josparlap otyrmyz», - dep qosty Jedel medıtsınalyq járdem ortalyǵynyń basshysy.
Qazirgi kezde budan basqa da ǵylymı zertteý jumystary júrgizilýde. «Bul emdeýdiń jańa tásilderin ázirleýdiń jáne AQSh-ta ázirlengen ádisterdi ómirge engizýdiń amerıkandyq-qazaqstandyq zertteý jobalary. Biraz ýaqyttan keıin ózimiz usyna alatyn tehnologııalar turǵysynan qaraǵanda da, biz maqtanysh etetin nárseler bolady dep oılaımyn», - dep qorytyndylady sózin K.Álibek.
Esterińizge sala keteıik, memleket basshysynyń «Áleýmettik-ekonomıkalyq jańǵyrtý - Qazaqstan damýynyń basty baǵyty» atty Qazaqstan halqyna Joldaýyndaǵy tapsyrmalarǵa sáıkes, Astana qalasynda Ulttyq medıtsınalyq holdıng bazasyndaǵy jańa Ulttyq ǵylymı onklogııalyq ortalyq qurý máseleli qarastyrylýda.
