Astanada zeınetkerlerge tıesili járdemaqyny tólemegeni úshin 11 laýazym ıesi jaýapqa tartyldy
ASTANA. KAZINFORM - «Nura» aýdanynyń prokýratýrasy eńbek zańnamasynyń saqtalý zańdylyǵyna taldaý júrgizdi, dep habarlaıdy Astana qalalyq prokýratýrasynyń baspasóz qyzmeti.
Astananyń keıbir memlekettik uıymdary men mekemeleri zeınet jasyna jetken qyzmetkerlerge zańnamamen kózdelgen járdemaqyny tólemegenderi anyqtaldy.
Qadaǵalaý aktisin qaraý nátıjeleri boıynsha 61 zeınetkerdiń quqyqtary jalpy somasy 6 mln teńgeden astam ótemaqy tóleý arqyly qorǵaldy.
- Jol berilgen buzýshylyqtar úshin 11 laýazymdy tulǵa tártiptik jaýapkershilikke tartyldy. Bul baǵyttaǵy jumystar júrip jatyr, - delingen Astana qalasynyń prokýratýrasy taratqan habarlamada.
Osyǵan deıin Atyraý oblysyna qarasty aýdanda 423 azamattyń zeınetaqy jáne áleýmettik tólemderi ýaqytyly túspegeni týraly jazdyq.
