Astanada zeınetkerler halyqtar birligin nasıhattap, erekshe aktsııa ótkizdi
ASTANA. KAZINFORM – Astanada 1 mamyr – Qazaqstan halyqtarynyń birligi kúni qarsańynda zeınetkerler patrıottyq chellendj ótkizip, erekshe sporttyq aktsııa uıymdastyrdy. Belsendi uzaq ómir súrý ortalyǵynyń 120 qatysýshysy «Qazaqstan – bizdiń ortaq úıimiz» bastamasyn qoldady, dep habarlaıdy elorda ákimdiginiń resmı saıty.
30 sáýir kúni tańǵy saǵat 8:00-de Nura aýdanyndaǵy Belsendi uzaq ómir súrý ortalyǵynyń zeınetkerleri Botanıkalyq saıabaqqa jınaldy. Skandınavııalyq serýen úıirmesiniń qatysýshylary «Taıqazan» nysanynyń janynda sap túzep, «1 mamyr» sózin beıneledi. Bul aktsııa eldegi birlik pen tatýlyqtyń sımvolyna aınaldy.
Іs-shara barysynda qatysýshylar sporttyq jattyǵýlar da oryndady. Olar «Atameken» patrıottyq ánin aıtyp, uzyndyǵy 1 700 metrlik sheńberdi úsh ret aınalyp ótti. Mundaı belsendilik zeınetkerlerdiń densaýlyǵyn nyǵaıtyp, sergek ómir saltyn ustanýyna yqpal etedi.
Úıirme jetekshisi Týǵanaı Beısembaevanyń sózinshe, bul bastama zeınetkerlerdiń ómir sapasyn arttyrýǵa baǵyttalǵan.
– Buǵan deıin sporttyń birneshe túrimen aınalystym: alǵashynda tramplınnen sekirý, keıin trıatlon boldy. 2024 jyldyń naýryz aıynda osy ortalyqqa jumysqa shaqyrdy. Belsendi uzaq ómir súrý ortalyǵyna kelip, skandınavııalyq serýen úıirmesin júrgizýdi bastadym. Bul – Qazaqstan úshin jańa sport túri. Qazir skandınavııalyq serýenge qyzyǵýshylyq óte joǵary, - dedi ardager sportshy.
Onyń aıtýynsha, úıirme qysqa ýaqyt ishinde keńinen tanylyp, qatysýshylar sany aıtarlyqtaı artqan.
– Alǵashynda 5 adam keldi, keıin 7 adam boldy, artynan 30-dan asty. Sosyn «dosyńdy ertip kel, tanysyńdy shaqyr» dep birtindep kóbeıdi. Qazir 12 otbasy birge qatysady. Jalpy topta 180 adam tirkelgen, onyń 135-i turaqty túrde jattyǵýǵa keledi. Mundaǵy kisilerdiń eń úlkeni 89 jasta, - dedi ol.
Týǵanaı Beısembaevanyń aıtýynsha, mundaı bastamalar zeınetkerlerdiń ómir sapasyn arttyryp, olardyń qoǵamdaǵy belsendiligin kúsheıtedi. Muny zeınetker Ǵalymjan Amanbaevtyń pikiri de rastaıdy.
– 78 jastamyn. Osy topqa qosylǵanyma eki jyl boldy. Aptasyna birneshe ret kelip, eki saǵat jattyǵý jasaımyz. Qandaı aýa raıy bolsa da kelemiz. Sonyń arqasynda densaýlyǵymyz jaqsaryp jatyr. Búgingi shara da erekshe kóńil-kúı syılady, - dedi ol.
Káris ultynyń ókili Roza Aleksandrqyzy 1 mamyr – Qazaqstan halyqtarynyń birligi kúni barlyq ultty biriktiretinin aıtty.
– Qazaqstan tolerantty memleket. Barlyq jaǵdaı jasalǵan. Qazaq, orys, sheshen, nemis – bárimiz birgemiz. Men Dýbaıda, Túrkııada, Koreıada boldym. Biraq Qazaqstannan artyq el joq. Shetelge shyqqanda óz elińniń qadirin túsinesiń. Biz qazaqstandyq bolǵanymyzǵa baqyttymyz, - dedi ol.
Zeınetkerlerdiń aıtýynsha, mundaı sharalar merekelik kóńil-kúı syılap qana qoımaı, kúndelikti ómirdiń ajyramas bóligine aınalǵan. Muny sharaǵa qatysýshy Gúljan Dúısembaev aıtty.
– 76 jastamyn. Kóbi jasyn aıtpaı qupııa ustaıdy ǵoı. Kerisinshe men maqtanamyn. Sebebi skandınavııalyq serýen tobynyń arqasynda densaýlyǵymdy jaqsartyp, jaqsy kóńil-kúıde júremin. Eki jyldan beri kelemin, óte unaıdy. Munda taza aýada serýendep, kóńil kóteremiz. Úıde otyrǵansha, osyndaı belsendi ómir súrgen durys. Barsha astanalyqty bizge qosylýǵa shaqyramyn, - dedi ol.
Uıymdastyrýshylardyń aıtýynsha, sharanyń negizgi maqsaty halyqtar arasyndaǵy dostyq pen kelisimdi nyǵaıtý. Sonymen qatar egde jastaǵy azamattar arasynda salaýatty ómir saltyn keńinen nasıhattaý.
Aıta keteıik, Nura aýdanyndaǵy áleýmettik qyzmet kórsetý bóliminde skandınavııalyq serýen úıirmesi eki jyldan beri jumys isteıdi. Qazir oǵan 187 zeınetker turaqty túrde qatysady.
Buǵan deıin Belsendi uzaq ómir súrý ortalyqtarynda zeınetkerlerge qandaı qyzmetter tegin kórsetiletinin jazǵanbyz.