Astanada zeınetker qart sot arqyly uldarynan alıment óndirip aldy
ASTANA. QazAqparat - Astana qalasynda zeınetker qart óziniń uldarynan alıment óndirip alý týraly sotqa shaǵymdandy, dep habarlaıdy QazAqparat qalalyq sottyń baspasóz qyzmetine silteme jasap.
«Qarttyǵynan jumysqa jaramsyz bolǵan zeınetker qosymsha materıaldyq kómekterdi qajet etetin bolǵan. Dárigerlerdiń udaıy baqylaý esebinde turǵan onyń zeınetaqysy tolyǵymen úıdegi qajettilikterdi satyp alýǵa, kommýnaldyq qyzmetter tólemine ketedi. Alaıda, qarııanyń kishi eki uly óz erikterimen ákelerin baǵýdan jaltarǵan», - delingen baspasóz baıanynda.
Aıta keterligi, sot buǵan deıin de zeınetkerdiń paıdasyna aı saıyn úlken ulynan 20 aılyq eseptik kórsetkish mólsherinde alıment óndirý týraly sheshim shyǵarǵan bolatyn. Al qarııanyń sońǵy shaǵymyn qaraǵan Astana qalasy Saryarqa aýdanynyń soty zeınetkerdiń talabyn ishinara qanaǵattandyrdy.
«Sot sheshimine sáıkes, qarııanyń úlken ulynan bólek, eki kishi uly da ózderiniń ákelerine aı saıyn 5 aılyq eseptik kórsetkish mólsherinde alıment tólep turatyn bolady. Qazaqstan Respýblıkasynyń zańnamasyna sáıkes, eńbekke qabiletti kámelet jasqa tolǵan azamattar ózderiniń kómekke zárý ata-analaryn baǵyp, olarǵa qamqorlyq etýleri kerek», - delingen baspasóz baıanynda.
