Astanada zeınetaqy men járdemaqyny rásimdeý jeńildedi
ASTANA. KAZINFORM – Bul jóninde qalalyq Ortalyq kommýnıkatsııalar qyzmetinde ótken baspasóz májilisinde Astana qalasy boıynsha Halyqty áleýmettik qorǵaý salasyndaǵy retteý jáne baqylaý komıteti departamentiniń basshysy Asqar Aımaǵambetov aıtty.
– Astanada zeınetaqy men memlekettik járdemaqylardy rásimdeý rásimi tsıfrlyq sheshimderdiń engizilýi nátıjesinde jeńildeı tústi. Qyzmetterdiń basym bóligi avtomattandyrylyp, birqatary azamattyń jeke ótinishinsiz-aq proaktıvti formatta kórsetiledi. Máselen, 2026 jyldyń birinshi jartyjyldyǵynda zeınetaqymen qamsyzdandyrý jáne memlekettik járdemaqylardy taǵaıyndaý salasynda 63 398 memlekettik qyzmet kórsetildi. Bul ótken jyldyń sáıkes kezeńimen salystyrǵanda 3,2 paıyzǵa kóp, - dedi spıker.
Departament basshysynyń sózinshe, qazirgi ýaqytta elordada 157 myńnan astam adam zeınetaqy tólemderin alady.
– Zeınetaqy jarnalary týraly málimetter memlekettik aqparattyq júıeler arqyly avtomatty túrde rastalady. Bul tólemderdi taǵaıyndaý rásimin jeńildetip, qyzmet kórsetý merzimin qysqartýǵa múmkindik beredi, - dedi ol.
Sondaı-aq, Asqar Aımaǵambetov proaktıvti qyzmet kórsetý tetigi de keńinen qoldanylatynyn atap ótti.
– Eger azamattyń belgili bir járdemaqyny alý quqyǵy týyndasa, aqparattyq júıe ony avtomatty túrde anyqtap, SMS-habarlama jiberedi. Azamat kelisimin rastaǵannan keıin tólemdi rásimdeý protsesi avtomatty túrde bastalady, - dedi ol.
Sonymen qosa, múgedektik boıynsha járdemaqy taǵaıyndaý kezinde qajetti málimetter memlekettik derekter bazalary arqyly tekseriletinin eske saldy. Sonyń nátıjesinde qosymsha qujattardy usynbaı-aq sheshim bir jumys kúni ishinde qabyldanady.
Aıta keteıik, zeınetaqy men memlekettik járdemaqylardy rásimdeýge qatysty kóptegen qyzmet eGov.kz portaly jáne ekinshi deńgeıdegi bankterdiń mobıldi qosymshalary arqyly qoljetimdi.
Eske salaıyq, Astanada zańsyz taǵaıyndalǵan 2,9 mln teńge zeınetaqy tólemi anyqtaldy.
