Astanada zergerlik óner kórmesi ótedi
ASTANA. 10 jeltoqsan. QazAqparat - 14 jeltoqsan kúni Astanada «Nazarbaev ortalyǵynyń» (burynǵy Prezıdenttik Mádenı ortalyq) Kúmis zalynda QR Táýelsizdiginiń 21 jyldyǵyna oraılastyrylǵan zergerlik óner kórmesi ashylady, dep habarlady QR Mádenıet jáne aqparat mınıstrliginiń baspasóz qyzmetinen.
Zergerlik ónerdiń has sheberleriniń kórmesi B. Alıbaı, E. Daýbaev, N. Jeerenchıev jáne Ý. Seıdalıev syndy mádenıet qaıratkerleriniń ótkeni men búgingisin tutastyryp, órnekterdiń qupııa syry men metaldyń plastıkasyn pash etedi.
15 qańtarǵa deıin jumys isteıtin kórmede usynylatyn zergerlik buıymdar baǵaly metaldar men asyl tastardan jasalǵan.
Zergerlik óner - qazaq halqynyń murat-maqsattaryn, onyń damý erekshelikterin, shyǵarmashylyq pen materıaldyq qundylyqtardy qabyldaý deńgeıin kórsetip, Qazaqstan mádenıetinde erekshe oryn alady. Ejelgi dáýirdegi on saýsaǵynan óner tamǵan zerger-sheberler baǵaly tastar men asyl metaldardan jasalǵan, qaıtalanbas Kóshpeli - Nomad álemi qorshaǵan orta sıýjettik órnekterimen áshekeıler men turmystyq zattaryn kómkere otyryp, «Óshpes» óner týyndylaryn urpaqtaryna mura etip qaldyrdy. Ortalyq Azııa halyqtarymen kóptegen uqsastyqtary bola tura, qazaq óneri qaıtalanbas bıik tulǵalylyǵyn saqtaı otyryp, músindik beıneligimen erekshelendi jáne munda kishkene pishinniń ózinde órnek pen fonnyń úılesimi jáne olardyń yrǵaqty kezektestigi seziledi. Olar metaldyń asyldyǵyn, tastardyń ásemdigi men sıqyr kúshin asha túskendeı.
Uıymdastyrýshylary: Qazaqstan Respýblıkasy Mádenıet jáne aqparat mınıstrligi, «Altyn jáne baǵaly metaldar murajaıy», «Nazarbaev ortalyǵy».
