Astanada «Zerger» qolóner kórmesi ashyldy
Bul týraly búgin Astanadaǵy «Nazarbaev ortalyǵynda» ashylǵan «Zerger» atty zergerlik óner kórmesiniń ashylý saltanatynda QR Mádenıet jáne aqparat mınıstri Darhan Myńbaı aıtty.
«Qazirgi zamanǵy zergerlik óner jumystarynyń kópshiligi ár túrli tehnıka kómegimen jasalyp júr. Degenmen sheberlerdiń qolynan shyqqan buıymdar - zergerlik ónerimizdiń qundy eskertkishteri bolyp qala bermek. Osy rette búgingi ashylyp otyrǵan «Zerger» kórmesi qazirgi zamanǵy otandyq zergerlik ónerdi jańa beleske shyǵarǵan aıshyqty da tartymdy qolóner týyndylaryn toptastyrady. Ózderińiz bilesizder, 2017 jyly elimizde ótkeli otyrǵan halyqaralyq «EHRO-2017» kórmesinde tek ekonomıkamyzdy ǵana emes, mádenıetimizdi de, bilimizdi de, ónerimizdi de pash etetin múmkindik týady. Soǵan osy bastan ázirlenip, osyndaı qolóner týyndylaryn kóptep daıyndaýymyz kerek», - dedi D. Myńbaı.
Qazaqstan Respýblıkasy Táýelsizdik kúni merekesine oraı ashylǵan kórmege Berik Álibaı, Estaı Daýbaev, Nadyrbek Jeerenchıev, Úsen Seıdalıev syndy zergerlik óneriniń has sheberleriniń qolynan shyqqan buıymdar qoıylǵan. Olardyń ishinde altyn jalatylyp, túrli baǵaly tastarmen áshekeılengen qarý-jaraq, qylysh, qanjar, aıbalta, sondaı-aq asa taıaqtar bar. Sonymen qatar, altyn dombyra, kúmis er-turman jáne áıelderdiń asyl buıymdary da bar.
