Astanada záýlim úıdiń baspaldaǵymen joǵary qaraı júgirýden jarys ótti
ASTANA. QazAqparat - Astanada alǵash ret záýlim úıge vertıkaldi júgirýden jarys ótti, dep habarlaıdy QazAqparat.
Bul sporttyq sharaǵa qatysýshylar 34 qabattan turatyn úıdiń 700 baspaldaǵyn eńserdi. Belgili bolǵandaı, Qazaqstannyń ár qalasynan marafonǵa qatysýǵa 300-den astam ótinim kelip tústi. Joǵary qaraı júgirýge 18 ben 50 jas aralyǵyndaǵy medıtsınalyq tekserýden ótken erler men názik jandylar qatysty.
Jalpy, jarys jolyna 208 marafonshy shyǵyp, onyń 164-i erler jáne 44-i áıelder. Olar alty sanat boıynsha, ıaǵnı 18-30 jas, 31-40, 41-50 jas aralyqtarynda saıysqa tústi.
Saıys kezinde úıdiń ár qabatynda medıtsınalyq qyzmettiń mamandary kezekshilik etti.
Osy jarystan jeńip shyqqandar aqshalaı syılyqtar men Astanadaǵy sport klýbtarǵa sertıfıkattar aldy.
Kóp qabatty záýlim úıdiń baspaldaǵymen joǵary qaraı júrigý alǵash ret 1977 jyly uıymdastyrylǵan bolatyn. Ol kezde osy sharaǵa qatysýshylar Nıý-Iorktegi Empire State Building-tiń eń joǵary qabatyna júgirip shyqqan edi. Sodan beri osy qozǵalys álem boıynsha tanymaldyqqa ıe bolyp, sporttyń túrine aınaldy.
