Astanada zardap shekkenderdi qaýipsiz jerge kóshirý, medıtsınalyq kómek kórsetý oqy-jattyǵýlary aıaqtaldy
ASTANA. 23 qarasha. QazAqparat - Astanada qalanyń jedel qyzmetteriniń, órt sóndirýshiler men qutqarýshylardyń zardap shekkenderdi qutqarý, qaýipsiz jerge kóshirý jáne medıtsınalyq kómek kórsetý boıynsha oqý-jattyǵýy ótti. Bul týraly astana.kz saıtyna Tótenshe jaǵdaılar departamentiniń baspasóz qyzmetinen habarlady.
Elordalyq jedel áreket etý otrıadynyń daıyndyǵyn baıqaý qorytyndysy boıynsha qalalyq qyzmetterdiń qysta oryn alatyn tótenshe jaǵdaılardy joıýǵa ázirligi tekserildi. Sonymen qatar, elektr qýaty, sýmen qamtý jelilerindegi apattardy joıý, bıik ǵımarattaǵy órtti sóndirý, zardap shekkenderdi qutqarý, evakýatsııalaý jáne ornalastyrý boıynsha is-áreketter oryndaldy. Oqý-jattyǵýǵa TJM 2 tikushaǵy tartyldy, olardyń mindeti - jaǵdaıdy barlaý, qutqarýshylardy desanttaý jáne zardap shekkenderdi medıtsınalyq mekemelerge jetkizý boldy. Budan basqa, ǵımaratta ómirdi qamtý jónindegi kóp maqsatty órt sóndirý kóliginiń múmkindikteri kórsetildi. Aıta keteıik, tájirıbege jeke quramnan 216 adam, 162 tehnıka, sonyń ishinde 2 tikushaq tartyldy.
