Astanada zańsyz turǵyzylǵan dámhana men ákimshilik ǵımarat súrildi
Qalalyq memlekettik sáýlet-qurylys baqylaý basqarmasy oń jaǵalaýda Lýı Paster kóshesi, 67 meken-jaıynda turǵan «Na vostoke» dámhanasy men ákimshilik ǵımarat boıynsha tekseris júrgizip, qos nysannyn zańsyz turǵyzylǵanyn anyqtaǵan. 
Tekserý nátıjeleri boıynsha atalmysh qurylysqa tapsyrys berýshi «Arnat» JShS-y ákimshilik jaýapkershilikke tartylǵan.
Al, 2017 jyldyń 26 qańtarynda Astana qalasynyń mamandandyrylǵan aýdanaralyq ekonomıkalyq soty «Arnat» JShS-na qarasty «Na vostoke» kafesi men ákimshilik ǵımaratty súrý týraly sheshim shyǵarǵan.
Biraq JShS-y sot sheshimimen kelispeı joǵarǵy ınstantsııalarǵa aryzdanǵan. Biraq shaǵymdanýshynyń aryzy qanaǵattandyrylmaı, alǵashqy sot sheshimi ózgerissiz qalǵan.
«2017 jyldyń 25 mamyrynda Astana qalasynyń ádilet departamentine «Arnat» JShS-na qarasty Lýı Paster kósh, 67 meken-jaıynda zańsyz turǵyzylǵan dámhana men ákimshilik ǵımaratty súrý boıynsha sot úkimin oryndaýǵa qaýly kelip tústi. Sodan beri JShS-ǵa zańsyz turǵyzylǵan ǵımarattardy buzý kerektigi boıynsha birneshe ret eskertý berilgen. Biraq kompanııa sot oryndaýshynyń eskertpesine mán bermeı keldi. Búgin sot sheshimin oryndaýǵa ózimiz kelip turmyz», - dedi Astana qalalyq ádilet departamentiniń bólim basshysy Erdáýlet Bolysbek.
Búgin memlekettik sot oryndaýshy sot sheshimin oryndaýǵa kirisip, arnaıy tehnıkalar alyp kelip, nysandy buza bastady. Biraq kompanııa basshysy ótinish jasap ǵımarattardy óz kúshimen buzýǵa ýáde berdi. Keler aptaǵa deıin qos nysan qıratylýy tıis.
