Astanada zańsyz salynǵan 76 nysannyń qurylysy toqtady

ASTANA. QazAqparat – Astanada zańsyz salynǵan 76 qurylys nysannyń jumysy toqtatyldy. Bul týraly QazAqparat ákimdikke silteme jasap habarlaıdy.

Qala aýmaǵynda ruqsat qujattary joq 96 nysannyń qurylysy júrgizilgen. Kóppáterli turǵyn úı kesheni nysandaryn óz betinshe salý máselesi jónindegi jumys toby zańsyz qurylys salý faktilerin anyqtap qana qoımaı, ruqsat qujattary joq qurylys salýshylarǵa jan-jaqty kómek kórsetedi. Osylaısha, 96 nysannyń 20-sy qurylys júrgizýine qajetti ruqsat qujattaryn tolyqtaı aldy. Jumys tobynyń quramyna memlekettik organdardyń qyzmetkerleri, qoǵamdyq uıymdardyń, Qazaqstan qurylysshylar odaǵynyń jáne Qazaqstannyń qurylys salýshylar qaýymdastyǵynyń ókilderi kiredi.

Qazirgi ýaqytta ruqsat qujattarynsyz qurylysy júrip jatqan 76 nysan anyqtaldy. Olardyń qatarynda: «Mars Project» JShS, «Aiz Kurylys» JShS, «Rýsaldıng Line» JShS, «Bıldıng kompanı» JShS, «Expert Consulting Agency Kazakhstan» JShS, «Taýekel Injınırıng» JShS, «Global Millennium» JShS, «Handan-Astana» JShS, «Oreol-Group» jáne t.b.

Ruqsat qujattarynsyz qurylys júrgizetin sýbektilerdiń bárine jumysyn toqtatý týraly nusqama beriledi ári ákimshilik jaýapkershilikke tartyldy. Sondaı-aq tıisti jer quqyǵynsyz qurylysy júrip jatqan 20 obekt (76 obektiniń ishinde) boıynsha sot organdaryna demontajdaý boıynsha talap aryzdar beriletin bolady.

Kóppáterli turǵyn úı keshenderi qurylysynyń jańa nysandary ruqsat qujattarynsyz júrip jatqany anyqtalar bolsa, bul obektiler óz betinshe salynyp jatqan qurylys dep tanylyp, buzylatyn bolady.

Sondaı-aq qalada «Turǵyn úı qurylysyna úlestik qatysý týraly» QR Zańynyń talaptaryn saqtaý boıynsha birqatar túıtkildi másele bar.

Sonymen qatar qala turǵyndaryn aqparattandyrý jáne zańnyń buzylýyna jol bermeý maqsatynda ákimdiktiń resmı resýrstarynda jáne BAQ-ta úleskerlerdiń aqshasyn qabyldaýǵa quqyǵy joq qurylys salýshylardyń «qara tizimi» júıeli túrde jarııalanyp turady.

Qurylys kompanııalary úleskerlerdiń qarajatyn mynadaı jaǵdaılarda ǵana qabyldaı alady:
1) turǵyn úı qurylysynyń biryńǵaı operatorynyń kepildigin alý;
2) Ekinshi deńgeıli banktiń jobasyna qatysý;
3) turǵyn úıdiń (turǵyn ǵımarattyń) qańqasy salynǵannan keıin úleskerlerdiń aqshasyn tartý.