Astanada zańsyz saqtalǵan qarýdy qabyldaý aktsııasy qarasha aıynyń sońyna deıin jalǵasady
ASTANA. 3 qarasha. QazAqparat - Elordada halyqtan zańsyz saqtalǵan qarý-jaraqty, oq-dárilerdi jáne jarylǵysh zattardy qabyldaý aktsııasy 30 qarashaǵa deıin jalǵasady. Bul týraly astana.kz saıty elordalyq ІІD baspasóz qyzmetine siletem jasap habarlady.
«Aktsııa bastalǵaly elorda turǵyndary 66 birlik qarý, sonyń ishinde, 12 ıir oıyqty jáne 50 tegis oqpandy myltyq, 1 gaz-travmatıkalyq, 3 travmatıkalyq, sonymen qatar, ıir oıyqty myltyqqa arnalǵan 3 227 dana oq-dári tapsyrǵan», - delingen habarlamada.
Vedomstvonyń habarlaýynsha, zańsyz saqtalǵan qarýdy tapsyrǵan qala turǵyndaryna 1 mln. 220 myń teńgeden astam qarjy tólendi.
«Shara barysynda zańsyz saqtalǵan qarý-jaraqty tapsyrǵan tulǵalarǵa qarýdyń túrine qaraı ár birligi úshin 10-100 aılyq eseptik kórsetkish kóleminde qarjy tólenedi»,- dep habarlady ІІD baspasóz qyzmeti. Budan basqa, tirkelmegen atys qarýyn, oq-dárilerdi jáne jarylǵysh zattardy óz erkimen tapsyrǵan adamdar qylmystyq jáne ákimshilik jaýapkershilikterden bosatylady.
Eske sala keteıik, Astanada halyqtan zańsyz saqtalǵan qarý-jaraqty, oq-dárilerdi jáne jarylǵysh zattardy qabyldaý aılyǵy 1 qyrkúıekte bastaldy.
