Astanada zańsyz ornatylǵan 17 uıaly baılanys antennasy alyndy
ASTANA. QazAqparat - Elordada 2018 jyly uıaly baılanystyń taratýshy qurylǵylarynan bólingen elektromagnıttik sáýlelerge 1557 ólshem júrgizilgen. Olardyń barlyǵynda da normadan aýytqýshylyq anyqtalmaǵan, dep habarlaıdy Astana ákimdiginiń resmı saıty.
«Degenmen elektromagnıttik sáýle taratýdyń ruqsat etilgen deńgeıi asyrylǵan jáne ruqsat qujattarynyń joqtyǵy rastalǵan jaǵdaıda ákimshilik aıyppul salý jáne azamattardyń densaýlyǵyna qaýip tóndirýi múmkin jabdyqty alyp tastaý boıynsha sharalar qabyldanady», - dep málimdedi qalalyq qoǵamdyq densaýlyq saqtaýdy qorǵaý departamentinde. «Qalalyq Qoǵamdyq densaýlyq saqtaýdy qorǵaý departamenti Kcell, ALTEL, Beeline jáne basqa da uıaly baılanys operatorlarynyń qurylǵylarynan elektromagnıttik sáýlelerdiń bólinýine únemi monıtorıng júrgizip keledi. 2018 jyly elorda turǵyndarynyń uıaly baılanys antennalary týraly ótinishterin tekserý nátıjesinde 17 uıaly baılanys antennasy alynyp tastaldy», - dep departament basshysy Sádýaqas Baıǵabylov kópqabatty úılerdiń shatyrlaryna uıaly baılanys antennalarynyń ornatylýyna qatysty elorda turǵyndarynyń shaǵymdaryna pikir bildirdi.
Uıaly baılanys antennalarynyń sanıtarlyq aýmaq saqtalmaı ornatylǵan jaǵdaıda, adamdardyń densaýlyǵyna keri áserin tıgizýi múmkin.
«Munyń sońy bas aýrýy, júrek-qan tamyrlary júıesi aýrýlaryna jáne gormonaldy ózgeristerge de ákep soǵýy yqtımal. Balabaqsha, mektep jáne ınternat ǵımarattaryna antennalardy ornalastyrýǵa tyıym salynady. Al turǵyn úı jáne ákimshilik ǵımarattardyń shatyrlaryna 100 Vt-tan astam qýaty bar taratýshy antennalardy ornalastyrýǵa tyıym salynǵan», - dedi Sádýaqas Baıǵabylov.
