Astanada zańsyz qoıylǵan saýda pavılondary men dúńgirshekter buzylýda
ASTANA. 20 mamyr. QazAqparat - Elordanyń Almaty aýdanynda zańsyz saýda jasaýmen kúres qarqyndy júrgizilýde.
Astana qalasynyń resmı saıtynyń habarlaýynsha, memlekettik jer telimderin ózdigimen ıelený zań buzýshylyǵyn toqtatý maqsatynda Almaty aýdanynyń ІІB jáne prokýratýrasy birlesken is-sharalardy júıeli túrde ótkizip turady.
Ákimdiktiń málimeti boıynsha, bir aıdyń ishinde, atap aıtqanda, bıylǵy jyldyń sáýirinen mamyryna deıin aýdanda 38 saýda pavılony men dúńgirshegi buzyldy. Jyl basynan beri zańsyz qoıylǵan jer telimderinen 119 dúńgirshek pen 2 avtodúken alyndy.
«Aýdan kásipkerleriniń esine salǵymyz keletini, jerdi zańsyz ıelenýge tyıym salynǵan. Mundaı keleńsizdik oryn alǵan jaǵdaıda QR Ákimshilik kodeksiniń 118-babyna sáıkes ákimshilik jaýapkershilikke tartylyp, 50-den 150 AEK kóleminde aıyppul salynady»,- dep atap kórsetti ákimdikten.
