Astanada zańsyz qoqys oryndaryn anyqtaý boıynsha kezekti tekseris júrgizildi (FOTO)
ASTANA. QazAqparat - Elordada zańsyz qoqys oryndaryn anyqtaý jáne joıý maqsatynda apta saıynǵy tekseris ótkizildi. Quramyna «Astana-Tazartý» JShS ınspektorlary jáne baqylaýshylary engen komıssııa tekserý barysynda qalany abattandyrý, sanıtarlyq kútip ustaý, qala aýmaǵyn tazartý jáne tazalyqty qamtamasyz etý erejelerin buzyp kelgen nysandardy anyqtady, dep habarlady qalalyq ákimdiktiń baspasóz qyzmeti.
Tekserý barysynda komıssııa Balqantaý kóshesi 94 mekenjaıynda birneshe nysandy anyqtady, onyń ıelerinde qatty turmystyq qaldyqtardy shyǵarýǵa kelisim bolmaı shyqty.
«Atalǵan mekenjaı boıynsha qonaq úı, jataqhana, dámhana ornalasqan, jeke tulǵalardyń atyna berilgen nemese zań bólimi arqyly jasalǵan qujat joq. Sáıkesinshe, olardyń qoqysty qaıda tastaıtyny túsiniksiz. Qoqysty ózderi shyǵaratyndaryn aıtady, biraq qoldarynda arnaıy kelisim joq, al olarda polıgonmen kelisim bolýǵa mindetti», - dep málim etti «Astana-Tazartý» JShS-iniń bas dırektory Ivan Lavrınenko.
Jataqhanada tirkelgen turǵyndardyń sany is júzinde turatyn adamdar sanymen sáıkes kelmeıdi. Mundaı qoǵamdyq turǵyn úıdiń turǵyndary jaqyn mańdaǵy konteınerlerdi paıdalanady, biraq qoqys shyǵarǵandary úshin tólem jasamaıdy.
Mysaly, «Qosalqa 4» mekenjaıy boıynsha ornalasqan jataqhanada bir turǵyn ǵana tirkelgen. Alaıda ǵımaratta 60-qa jýyq bólme bar. «Astana-Tazartý» JShS ókilderi onda is júzinde turyp jatqan adamdardyń naqty sanyn bile almady.
«Tolstoı 32» mekenjaıy boıynsha da osyǵan uqsas jaǵdaı anyqtaldy. Qujat boıynsha munda 24 adam turyp jatyr. Qurylys shamamen 110 bólmege eseptelgen alty qabatty ǵımarat bolyp tabylady. Al «Ýálıhanov 22/9» kóshesindegi jataqhanada 30 turǵyn tirkelse, is júzinde ǵımarat 60-70 bólmege eseptelgen.
Osyndaı jaǵdaılar anyqtalǵan soń atalǵan qurylystardyń ıeleri onda turatyn adamdardyń naqty sanyn kórsete otyryp, kelisimge qaıta otyrýǵa májbúr boldy.
