Astanada zańsyz qoqys oryndary anyqtaldy (FOTO)
ASTANA. QazAqparat - Astanada abattandyrý erejelerin buzýdyń birneshe faktisi anyqtaldy, dep habarlady qalalyq ákimdiktiń baspasóz qyzmetinen.
«Kún saıyn Astanada 1000 tonnadan astam qoqys jınalady. Elordany abattandyrý erejelerine sáıkes ol kómý úshin zańdy polıgonǵa shyǵarylady. Qalada arnaıy qurylǵan jumys toptary tazalyqtyń saqtalýyn baqylaıdy. Búgin qala aýmaǵyn tekserý aıasynda abattandyrý erejelerin buzýdyń birneshe faktisi anyqtaldy», delingen habarlamada.
Jumys tobynyń ókilderi «Qulager» JShS qurylys obektisi aýmaǵynda kómilgen qaldyqtardy tapty. «Esil» aýdandyq tabıǵat qorǵaý polıtsııasynyń ınspektory QR Ákimshilik quqyq buzýshylyq kodeksine sáıkes, «Qulager» JShS basshylyǵyn ákimshilik jaýapkershilikke tartyp, 100 AEK mólsherinde aıyppul salý týraly hattama berdi.
Ekologııa departamenti QR ekologııalyq zańnamasynyń talaptaryna sáıkes, kompanııa basshylyǵyn ákimshilik jaýapkershilikke tartý boıynsha sharalardy qabyldaıdy.
Sonymen qatar, abattandyrý erejelerin buzǵany úshin «Arman qurylys» JShS 30 AEK mólsherinde aıyppul tóleýi kerek. Jumys tobynyń ókilderi jumystar júrgizilip jatqan aýmaqtardyń qorshalmaǵanyn, biraq belgiler qoıylyp, lentalar tartylǵanyn, qurylys qaldyqtary ýaqytyly shyǵarylmaıtyndyqtan qoqys oryndary paıda bolǵanyn anyqtady.
Elordany abattandyrý erejelerin saqtaý boıynsha reıdter turaqty túrde ótkiziledi. 18 sáýir men 18 mamyr aralyǵynda ótken ekologııalyq aılyq barysynda zańsyz qoqys oryndarynan 10 myńnan astam qoqys shyǵaryldy.
Eske salaıyq, ótken apparat otyrysynda qala ákimi qalalyq qyzmetterge eki aptanyń ishinde qurylys jáne turmystyq qoqys tastaý oryndaryn tazalap, elordany abattandyrý men sanıtarlyq normalardy buzýdy joıýdy tapsyrǵan bolatyn.
