Astanada zańsyz «Dıýfaston» preparaty anyqtaldy
ASTANA. QazAqparat - Astana qalasy boıynsha medıtsınalyq jáne farmatsevtıkalyq qyzmetti baqylaý komıteti tirkelmegen preparattar boıynsha tekeris ótkizdi, dep habarlaıdy QazAqparat tilshisi.
Tekseris kezinde Astanadaǵy bir dárihanada Qazaqstan boıynsha tirkelmegen «Dıýfaston» atty preparattyń satylǵany anyqtaldy. Osydan keıin barlyq materıaldar sotqa jiberildi. Sot otyrysy barysynda kásipker óz kinásin tolyǵymen moıyndady. Oǵan qatysty ákimshilik jaza qoldanyldy.
«Astana qalasynyń mamandandyrylǵan aýdanaralyq ákimshilik soty jeke kásipker K.-ny Ákimshilik quqyq buzýshylyq kodeksiniń 426-baby, 2-tarmaǵy boıynsha kináli dep tanyp, 100 aılyq eseptik kórsetkish (1 AEK - 2 405 teńge) kóleminde aıyppul tóleýge mindettedi. Dárihana bir aıǵa jabylady. Al «Dıýfaston» preparaty tolyǵymen tárkilenedi», - delingen sottyń resmı habarlamasynda.
