Astanada zańsyz aınalymnan 120 keliden astam esirtki zattary tárkilendi -ІІD
ASTANA. 24 mamyr. QazAqparat /Qanat Mámetqazyuly/ - Aǵymdaǵy jyldyń 12 mamyrynda jedel izdestirý jáne arnaıy sharalar kesheni barysynda Astana qalasy Іshki ister departamenti Esirtki bıznesimen kúres basqarmasynyń qyzmetkerleri Astana-Pavlodar kúre jolyndaǵy «Shanhaı» bazarynda «Mersedes-Bents» avtokóligi júrgizýshisinen 774,96 gram «marıhýana» jáne 361,74 gram «gashısh» esirtki zattaryn tárkiledi.
Qazirgi ýaqytta ol azamat ýaqytsha qamaýda ustaý orynyna jabylǵan. Bul týraly búgin Іshki ister departamentinde ótken baspasóz máslıhatynda málim boldy.
«Jalpy 2011 jyldyń basynan beri Astana qalasy aýmaǵynda 109 qylmystyq is qozǵalsa, onyń ishinde 46 is esirtki satýmen aınalysqan tulǵalarǵa qatysty bolyp otyr. Esirtki satýdy júzege asyryp kelgen 13 oryn anyqtalyp, joıyldy. Zańsyz aınalymnan 120 keli 114 gramm esirtki zattary, onyń ishinde 3 keli 715 gramm geroın tárkilengen», - dedi ІІD baspasóz hatshysy Nurdildá Oraz. Qala aýmaǵynda 130 adam atalǵan qylmysqa qatysty ákimshilik jaýapkershilikke tartylǵan. Ákimshilik sotynyń sheshimimen 49 adam tutqyndalyp, 16 adamǵa 193 myń 530 teńge kóleminde aıyppul salynǵan.
