Astanada zańsyz salynǵan nysan buzylady
ASTANA. KAZINFORM — Astanada sáýlet, qala qurylysy jáne qurylys salasyndaǵy zań talaptaryn buza otyryp salynǵan zańsyz turǵyn jaı emes nysan buzylady. Bul týraly elorda ákimdiginiń resmı saıty habarlady.
Astana qalasynyń Memlekettik sáýlet-qurylys baqylaý basqarmasy (MSQB) jospardan tys tekserý júrgizgennen keıin nysan ıesine qatysty ákimshilik sharalar qoldanylyp, anyqtalǵan zań buzýshylyqtardy joıý týraly nusqama berilgen.
Sot sheshimimen nysan ıesi ákimshilik jaýapkershilikke tartylyp, nysandy májbúrli túrde súrý týraly sheshim qabyldandy. Qazir basqarma Ádilet departamentimen birlesip, sot sheshimin oryndaý sharalaryn júrgizip jatyr.
Jyl basynan beri basqarma 497 jospardan tys tekserý júrgizip, zań buzýshylyqtardy joıý týraly 243 nusqama bergen. Sondaı-aq jalpy somasy 343 mıllıon teńgeden asatyn 860 ákimshilik aıyppul salynǵan.
— Elorda turǵyndaryna sáýlet, qala qurylysy jáne qurylys talaptaryn saqtaý máselesi eskertiledi. Zańsyz qurylys júrgizip, belgilengen normalardy buzǵandar zań boıynsha jaýapqa tartylady, — delingen aqparatta.
Aıta keteıik, Almatyda zańsyz salynǵan kezekti nysandar buzylyp jatyr.
