Astanada zańsyz lombard ashqan kásipker 1 jylǵa sottaldy
ASTANA. KAZINFORM — Astanada lıtsenzııasyz mıkrokredıt berip, zańsyz jolmen 82,9 mln teńge tabys tapqan kásipker bir jylǵa bas bostandyǵynan aıyryldy. Bul týraly Astana qalasynyń qylmystyq ister jónindegi aýdanaralyq soty habarlady.
Sonymen qatar onyń banktik shottaryndaǵy 3,2 mln teńgeden astam qarajaty tárkilendi.
Sot málimetinshe, kásipker 2021 jylǵy maýsymda Astanada jyljymaly múlikti kepilge qoıyp, qaryz beretin pýnkt ashqan. Alaıda ol mundaı qyzmetti júzege asyrýǵa qajetti lıtsenzııa almaǵan.
Kásipker qyzmetin zańdy etip kórsetý úshin klıenttermen komıssııalyq sharttar jasasqan. Іs júzinde ol azamattarǵa múlkin kepilge qoıý arqyly qaryz berip otyrǵan. Qaryz somasyna kúnine 0,2-0,8 paıyz aralyǵynda ústeme eseptelgen. Al tólem merzimi ótip ketse, paıyzdyq mólsherleme eki ese artqan.
Kásipker qarjylyq operatsııalaryn esepke alý úshin «Smart Lombard» aqparattyq júıesin paıdalanǵan. Alaıda qyzmetin zańdastyrý úshin lıtsenzııa alýǵa ótinish bermegen.
Tergeý barysynda onyń banktik shottaryna jalpy somasy 339 mln teńgeden astam qarajat túskeni anyqtalǵan. Onyń 82,9 mln teńgesi zańsyz tabys dep tanylǵan.
Sotta kásipker kinásin tolyq moıyndap, jasaǵan isine ókingen. Ol is boıynsha anyqtalǵan mán-jaılar men zańsyz tabys somasyna da daý aıtpaǵan.
Sot qandaı jaza taǵaıyndady?
Sot kásipkerdiń kinásin moıyndap, ókingenin eskergenimen, zańsyz tapqan aqshasynyń ótelmegenin de nazarǵa alǵan.
— Nátıjesinde oǵan múlkin tárkileı otyryp, eki jylǵa bas bostandyǵynan aıyrý jazasy taǵaıyndalǵan. Alaıda 2026 jylǵy 1 shildedegi raqymshylyq jasaý týraly zańǵa sáıkes, jaza merzimi eki ese qysqartylyp, bir jylǵa deıin azaıtylǵan. Budan bólek, sottalǵan azamattyń banktik shottaryndaǵy jalpy somasy 3 293 117 teńge qarajaty tárkilengen. Sot úkimi ázirge zańdy kúshine engen joq, — delingen habarlamada.
Buǵan deıin «Albı» lombardtar jelisi zańsyz qyzmetten 146 mln teńgeden astam tabys tapqanyn jazdyq.
