Astanada zańsyz qurylys jarnamasyna tosqaýyl qoıyldy
ASTANA. KAZINFORM — Elordada úlestik qurylys nysandaryn zańsyz jarnamalaǵan aqparattyq alańdarǵa shara qoldanyldy. Bul týraly Qalalyq kommýnıkatsııalar qyzmetinde ótken brıfıngte qala prokýrorynyń kómekshisi Azamat Qazbekov málimdedi.
Quqyq buzýshylyqtyń aldyn alýǵa baǵyttalǵan mundaı tájirıbe alǵash ret engizilip otyr.
— Úlestik qurylys salasyndaǵy zańsyz jarnamany anyqtap, jolyn kesý maqsatynda tıisti sharalar qabyldadyq. Bul jumys, eń aldymen, Krisha.kz pen 2GIS servısterindegi jarnamalyq materıaldarǵa qatysty júrgizildi, — dedi Azamat Qazbekov.
Onyń aıtýynsha, bul qadam azamattardyń quqyǵyn qorǵaýdy jáne qurylys salasynda zańdylyq ornatýdy kózdeıdi. Sondaı-aq zańsyz ketken memlekettik aktıvterdi qaıtarý men menshik quqyǵyn qorǵaý — «Zań men tártip» qaǵıdatyn iske asyrýdyń basty tetigi.
Aıta keteıik, buǵan deıin elordada quny 2 mlrd teńgeden asatyn ınjenerlik jeliler memleketke qaıtarylǵany týraly habarlanǵan edi.
