Astanada zańsyz ınternet-kazınolar arqyly 188 mlrd teńge aınalymǵa túsken
ASTANA. KAZINFORM – Elordada zańsyz ınternet-kazınolardyń jumys isteýine jaǵdaı jasaǵan bir top adamǵa qatysty qylmystyq is sotqa joldandy. Zańsyz oıyn bıznesiniń tólem júıesi arqyly 188 mlrd teńgeden astam qarjy aınalymǵa túsken, dep habarlaıdy Qarjylyq monıtorıng agenttigi.
Agenttiktiń Astana qalasy boıynsha departamenti «Nomadgames» jáne «Sultangames» ınternet-kazınolary men olardyń kóshirme saıttaryna qatysty tergeýdi aıaqtady.
Tergeý málimetinshe, oıynshylardan aqsha qabyldaý úshin tólem uıymdary, bank ekvaırıngi, POS jáne ınternet-termınaldar, elektrondyq ámııandar men krıptovalıýta quraldaryn qamtıtyn kópsatyly tólem júıesi qurylǵan.
Bul shemaǵa bank salasynyń ókilderi de qatysqan. Olar ınternet-kazınolardy tólem ınfraqurylymyna qosýǵa, mindetti tekserýsiz sharttar jasasýǵa jáne ınternet-termınaldarǵa tıisti MCC-kodtaryn berýge kómektesken.
– Aqsha operatsııalarynyń shyn mánindegi maqsatyn jasyrý úshin olar zańdy býkmekerlik jáne ózge de kásipkerlik qyzmet aıasynda júrgizilgendeı kórsetilgen, – dep habarlady agenttik.
Osylaısha elektrondyq termınaldar arqyly 188 mlrd teńgeden astam qarjy aınalymǵa túsken.
Qylmystyq jolmen alynǵan tabysty zańdastyrý úshin kúdiktilerdiń baqylaýyndaǵy jaýapkershiligi shekteýli seriktestik paıdalanylǵan. Jalǵan shart negizinde onyń esepshottaryna 10 mlrd teńge aýdarylǵan.
Keıin bul qarajat krıptovalıýtaǵa aıyrbastalyp, kúdiktilerdiń krıptoámııandaryna jiberilgen. Tergeý barysynda jalpy somasy 19 mln USDT bolatyn tsıfrlyq aktıvterdiń qozǵalysy anyqtaldy.
Sot sanktsııasymen úsh páterge, alty avtokólikke, sondaı-aq jalpy quny 1,4 mlrd teńge bolatyn krıptoaktıvter men bank shottaryndaǵy qarajatqa tyıym salyndy.
Eki kúdikti qamaýǵa alyndy. Taǵy úsheýine kepil túrindegi bultartpaý sharasy qoldanyldy. Qalǵan eki kúdiktiden eshqaıda ketpeý jáne tıisti minez-qulyq týraly qolhat alyndy.
Qylmystyq is sotqa joldandy. Qylmystyq-protsestik kodekstiń 201-babyna sáıkes ózge málimetter jarııa etilmeıdi.
Aıta keteıik, buǵan deıin Shymkentte «Bingo-37» jáne «Lotoboom» platformalary arqyly zańsyz onlaın-kazıno uıymdastyrǵan eki adam tórt jylǵa bas bostandyǵynan aıyrylǵan edi. Eki platformanyń jalpy aqsha aınalymy 3,1 mlrd teńgeni quraǵan.
