Astanada zańsyz avtoturaqqa qarsy jańa baqylaý júıesi iske qosyldy
ASTANA. KAZINFORM – Mamandardyń aıtýynsha, retsiz qoıylǵan kólikter júrgizýshiniń kórý múmkindigin shektep, ásirese balalardyń joldy der kezinde baıqaýyna kedergi keltiredi.
Astanada jol qaýipsizdigin kúsheıtý jáne zańsyz avtoturaqtardyń aldyn alý maqsatynda prokýratýra men qalalyq mekemeler birlesken jańa baqylaý júıesin iske qosty — «Zań men tártip» logotıpi bar mobıldi keshender qala kóshelerinde turaqtap, ereje buzýshylyqtardy avtomatty túrde tirkeıdi.
Joba aıasynda avtokólikterge «Zań men tártip» logotıpteri jabystyryldy. Bastamanyń negizgi maqsaty — zańsyz avtoturaqtyń aldyn alý jáne jol qozǵalysy qaýipsizdigin kúsheıtý.
Mamandardyń aıtýynsha, retsiz qoıylǵan kólikter júrgizýshiniń kórý múmkindigin shektep, ásirese balalardyń joldy der kezinde baıqaýyna kedergi keltiredi. Mundaı jaǵdaılar jol-kólik oqıǵalarynyń týyndaý qaýpin arttyrady jáne jedel qyzmetterdiń qozǵalysyna da qolaısyzdyq týdyrady.
Qalalyq jol qozǵalysyn uıymdastyrý ortalyǵy mamandarynyń málimetinshe, mobıldi apparattyq-baǵdarlamalyq keshender tyıym salynǵan aýmaqtardy avtomatty túrde baqylaıdy. Eger kólik ruqsat etilmegen jerge qoıylsa, júıe quqyqbuzýshylyqty tirkep, aıyppul rásimdeýge múmkindik beredi.
— Mundaı keshender qala kóshelerinde turaqty túrde jumys isteıdi. Negizgi maqsat — zańsyz avtoturaqtardy anyqtaý jáne olardyń aldyn alý. Eger bir júrgizýshi erejeni qaıtalap buzsa, aıyppul da qaıta tirkelýi múmkin. Sondyqtan kóp jaǵdaıda júrgizýshiler tártipke beıimdeledi. Kóliktiń júk salǵysh bóliginde ınternet taratý qurylǵysy ornatylǵan, sol arqyly júıe úzdiksiz jumys isteıdi. Biz arnaıy marshrýtpen qozǵalyp, quqyqbuzýshylyqtardy tirkep otyramyz. Orta eseppen bir kólik kúnine shamamen 100-ge jýyq quqyqbuzýshylyqty anyqtaıdy, — dedi Qalalyq jol qozǵalysyn uıymdastyrý ortalyǵynyń júrgizýshisi Zarhan Saparqul.
Joba barysynda mobıldi apparattyq-baǵdarlamalyq keshender arqyly quqyqbuzýshylyqtar tirkelip, turǵyndarǵa túsindirý jumysy júrgiziledi. Uıymdastyrýshylardyń málimetinshe, bastama aı saıyn 100 myńnan astam azamatty qamtıdy. Sonymen qatar jol boıynda aqparattyq býkletter taratylyp, túsindirý-nasıhat sharalary ótkiziledi.
Astana qalasy prokýratýrasynyń basqarma prokýrory Aqjol Sátilda atap ótkendeı, mundaı bastamalar jol qozǵalysy qaýipsizdigin arttyrýǵa baǵyttalǵan.
— Tyıym salynǵan jerlerge kólik qoıý — jol qozǵalysyna qatysýshylar úshin úlken qaýip tóndiredi. Bul ásirese jaıaý júrginshilerge, sonyń ishinde balalarǵa tikeleı áser etedi. Jol erejelerin buzý, jyldamdyqty arttyrý jáne manevr jasaý talaptaryn saqtamaý — aýyr saldarǵa ákelýi múmkin. Mobıldi APK júıeleri quqyqbuzýshylyqtardy anyqtap, tirkeý arqyly jol qaýipsizdigin qamtamasyz etýge yqpal etedi. Jalpy, bul — tártip pen jaýapkershilikti qalyptastyrýǵa baǵyttalǵan mańyzdy qadam, — dedi ol.
Uıymdastyrýshylar qala turǵyndaryn avtoturaq erejelerin saqtaýǵa shaqyryp, joldaǵy tártip pen jaýapkershilik balalar qaýipsizdiginiń negizgi kepili ekenin atap ótti.
Aıta ketelik Astananyń keıbir bóliginde aqyly turaqtardyń tólemi ózgerýi múmkin.
