Astanada zańsyz alkogol saýdasyna qarsy baqylaý kúsheıtildi
ASTANA. KAZINFORM — Astananyń Saryarqa aýdanynda «Zań men tártip» qaǵıdatyn iske asyrý aıasynda alkogol ónimderiniń zańsyz aınalymynyń jolyn kesý jumysy júrip jatyr, dep habarlaıdy elorda ákimdiginiń resmı saıty.
Osyndaı zańbuzýshylyqtardyń biri kezekti reıd barysynda anyqtaldy. Aýdan aýmaǵyndaǵy oıyn-saýyq oryndarynyń birinde tıisti ruqsat qujattarynsyz satý maqsatynda alkogol ónimderi saqtalǵany belgili boldy.
Tekserý kezinde 30-dan astam bótelke alkogol ónimi tárkilendi. Olardyń arasynda qoldan jasalǵan jáne shyǵý tegi belgisiz alkogol de bolǵan.
Mundaı ónimderdiń zańsyz aınalymy azamattardyń ómiri men densaýlyǵyna eleýli qaýip tóndiredi. Osyǵan baılanysty jınalǵan barlyq materıal qoldanystaǵy zańnamaǵa sáıkes shara qabyldaý úshin Saryarqa aýdany boıynsha memlekettik kirister organdaryna joldandy.
Mundaı zańbuzýshylyqtardy anyqtaý jáne jolyn kesý jumystary turaqty túrde júrgizilip keledi. Aýdan ákimdigi turǵyndardy alkogol ónimderiniń zańsyz satylý derekteri týraly habarlaýǵa shaqyrdy.
— Árbir ótinish qaralyp, túsken aqparat ýákiletti organdarmen birlesip tekseriledi. Aýdandaǵy qaýipsizdik pen quqyqtyq tártipti tek birlesken kúsh-jiger arqyly qamtamasyz ete alamyz, — dep atap ótti ákimdikte.
Osydan buryn Jambyl oblysynda alkogol satqan dúken ıesine 3 mln teńge aıyppul salynǵanyn jazǵanbyz.
