Astanada zańsyz aktıvter esebinen 12 bilim berý nysanyna qansha qarajat bólindi
ASTANA. KAZINFORM — Astana qalasynyń Qurylys basqarmasy zańsyz ıemdenilgen aktıvterdi qaıtarý týraly zańdy iske asyrý aıasynda 2023–2026 jyldary qalada 12 bilim berý nysanyn salýǵa Bilim berý ınfraqurylymyn qoldaý qorynan 27,4 mlrd teńge bólingenin málim etti.
— Búginde atalǵan 12 nysannyń 8-i paıdalanýǵa berildi. Atap aıtqanda, № 53, № 44, № 59 jáne № 5 mektepterine qosymsha ǵımarattar, Kókseńgir kóshesi boıyndaǵy mektep, Qarasaı batyr men Bulanty kósheleri aýdanyndaǵy mektep, Uly dala dańǵyly men Saýran kóshesi qıylysyndaǵy, sondaı-aq Turan dańǵyly men № 24 kóshesi aýdanyndaǵy mektepter iske qosyldy, — dep jaýap berdi vedomstvo Kazinform agenttiginiń saýalyna.
Sonymen qatar qalǵan 4 nysannyń qurylysy 2026 jylǵy 1 qyrkúıekke deıin aıaqtalady dep josparlanyp otyr. Olar — № 79, № 86, № 17 jáne № 27 mektepterine arnalǵan qosymsha ǵımarattar.
Buǵan deıin Bas prokýratýra byltyr sottar memleketke 165 mlrd teńgege jýyq zańsyz aktıvterdi qaıtarý týraly sheshim shyǵarǵanyn habarlaǵan edi.
Sonymen qatar Memleket basshysy Qasym-Jomart Toqaev Turkistan gazetine bergen suhbatynda zańsyz aktıvterdi elge qaıtarý arqyly áleýmettik ádildikti qalpyna keltirý — konıýktýra ne bolmasa jurtqa jaǵý úshin jasalǵan saıası naýqan emes dep atap ótti.
Eske sala keteıik, 2022 jyldan beri memleketke jáne kvazımemlekettik sektor sýbektilerine 1 trıllıon 130 mıllıard teńgeden astam aktıv qaıtaryldy.
