Astanada zańnamalyq qyzmet máseleleri jónindegi vedomstvoaralyq komıssııanyń 205-shi májilisi ótti

dep habarlaıdy QazAqparat. 

Otyrys barysynda Úkimettiń 2010-shy jyldarǵa arnalǵan zań jobalary jónindegi jumystardyń josparyna qatysty máseleler talqylandy. Onda elimizdegi zań  shyǵarý qyzmetin jetildirýge baılanysty atqarylyp jatqan ister jóninde baıandaǵan mınıstr Rashıd Túsipbekovtyń sózine qaraǵanda, qazir zań jobalarynyń teorııalyq negizderin qalaýmen aınalysatyn mınıstrlik janyndaǵy ınstıtýttyń mártebesin kóterý josparlanyp otyr. «Atap aıtqanda, atalmysh ınstıtýt endi kommertsııalyq qurylymnan memlekettik mekemege aınalady. Osyǵan oraı oǵan múmkindiginshe biliktiligi joǵary mamandar tartylmaq. Bul shara óz kezeginde zańnamalyq bastamalardyń sapasyn arttyrýǵa jáne saraptaý-taldaý jumystarynyń jetilýine yqpal etpek», dedi mınıstr.

Sondaı-aq ol sózinde 2010 jylǵa arnalǵan zańnamalardy daıyndaý jospary Memleket basshysynyń mınıstrlik aldyna qoıǵan mindetteri men 2010-2020 jyldardy qamtıtyn «Quqyqtyq saıasat tujyrymdamasy» talaptaryna saı daıyndalǵandyǵyn aıtty. Aldaǵy jylǵa barlyǵy 24 zań jobasy daıyndalyp otyr.