Astanada zań buzǵan 61 qurylys kompanııasy ákimshilik jaýapkershilikke tartyldy

ASTANA. KAZINFORM – Astanada zań buzǵany úshin 61 qurylys kompanııasy ákimshilik jaýaptylyqqa tartyldy. Salynǵan aıyppuldardyń jalpy somasy 49 mln teńge boldy. Bul týraly Astana qalasynyń prokýratýrasy habarlady. 

2025 jyldyń basynan beri qadaǵalaý sharalarynyń qorytyndysy boıynsha salynyp jatqan turǵyn úı keshenderindegi páterlerdi zańsyz satýdyń kóptegen faktileri anyqtaldy. Zań buzǵany úshin 61 qurylys kompanııasy ákimshilik jaýapkershilikke tartyldy. Salynǵan aıyppuldardyń jalpy somasy 49 mln teńge boldy.

— Prokýratýra ákimshilik shara qoldanýmen qatar úleskerlerdiń qarajatyn zańsyz tartý boıynsha alaıaqtyq shemalardy uıymdastyrǵan qylmystyq tergeý bastady.

Tergeý qorytyndysy boıynsha 5 adam qylmystyq jaýapkershilikke tartylyp, múlik tárkilendi, — delingen prokýratýra habarlamasynda.

Sot 900-den astam úleskerdiń múddesi úshin berilgen prokýratýranyń 10 talap-aryzyn qanaǵattandyrdy. Sot sheshi boıynsha olardyń paıdasyna 11 mlrd teńgeden astam qarajat óndirildi, sondaı-aq 4 jer ýchaskesi qaıtaryldy.

Astana qalasynyń prokýratýrasy azamattardy qurylys satysynda turǵyn úı satyp alý kezinde qyraǵy bolýǵa shaqyrady.

— «Turǵyn úı qurylysyna úlestik qatysý týraly» zańǵa sáıkes salynyp jatqan turǵyn úıdi satý kezinde aldyn ala kelisimderdiń kez kelgen nysandaryna, onyń ishinde brondaý, ınvestıtsııalaý sharttaryna, sondaı-aq aldyn ala satyp alý-satý sharttaryna tyıym salynady.

Úlestik qurylys sheńberinde jyljymaıtyn múlikti satyp alý jónindegi mámileler tek qolma-qol aqshasyz nysanda júzege asyrylýǵa jatatynyna nazar aýdaramyz, — delingen habarlamada.

Aıta ketelik búgin Prezıdent Qurylys kodeksine qol qoıǵan edi.