Astanada zamanaýı bessaıystan Álem kýbogynyń fınaly ótedi
ASTANA. QazAqparat - Zamanaýı bessaıystan Álem kýbogynyń fınalyna álemniń úzdik sportshylary qatysady, dep habarlaıdy QazAqparat tilshisi.
Zamanaýı bessaıystan Álem kýbogynyń fınalynyń ótkizilýine oraı uıymdastyrylǵan baspasóz konferentsııasynda QR Mádenıet jáne sport mınıstri Arystanbek Muhamedıuly atalǵan sporttyń elimizde qarqyndy damyp kele jatqandyǵyn atap ótti.
«QR Mádenıet jáne sport mınıstrligi atynan barlyq qatysýshylar men jarystyń qonaqtaryna Qazaqstanǵa qosh keldińizder degim keledi. Qazaqstan alǵash ret qazirgi bessaıystan Álem kýbogi fınalyn qabyldap jatyr. Óz atymnan Halyqaralyq Odaqqa úlken alǵysymdy aıtqym keledi. Sońǵy ýaqytta bessaıys elimizde qarqyndy damyp keledi. Qazirgi ýaqytta Qazaqstan Respýblıkasy sportshylarynyń qorjynynda zamanaýı bessaıys boıynsha Azııa chempıonatynyń altyn medali, jastar arasyndaǵy Álem chempıonatynyń kúmis medali, UIPM Álem kýbogy fınalynyń qola júldesi men Azııa chempıonatynyń kúmis medali bar. Men osy jarysta jańa esimder paıda bolady degen senimdemin. Barlyq sportshylarǵa sáttilik tileımin», -dedi Arystanbek Muhamedıuly.
Óz kezeginde, Zamanaýı bessaıystan Halyqaralyq Odaq prezıdenti Klaýs Shorman, zamanaýı bessaıystan Álem kýbogy fınalyn ótkizetin memleketti tańdaýda qandaı negizderge súıengenderin aıtyp berdi.
Ulttyq quramanyń bas bapkeri Vadım Chýdnovskıı qazaqstandyq sportshylardyń basty básekelesteri men Álem kýbogyna jalpy daıyndyq týraly aıtty.
Aıta keteıik, qazirgi bessaıystan Álem kýbogynyń fınaly maýsymnyń 21-24 aralyǵynda «Saryarqa» velotregi, «Barys Arena» sport kesheni, «Qazanat» atshabary bazalarynda ótedi. Shara Astana qalasynyń 20 jyldyǵyna arnalyp otyr. Fınalǵa álemniń eń úzdik sportshylarynyń tizimine engen 36 er jáne 36 áıel sportshy kele jatyr.
Qazaqstan tarıhynda zamanaýı bessaıystan el abyroıyn qorǵaǵan myqty sportshylar barshylyq. Atap aıtqanda, 1996 jyly Atlantada ótken Olımpıada oıyndarynda Aleksandr Parygın Qazaqstannyń qorjynyna altyn medal salyp bergen bolatyn.
