Astanada zamanaýı balet keshi ótedi
ASTANA. QazAqparat - Jeltoqsannyń 1-2 kúnderi «Astana Balet» teatrynda zamanaýı balet keshi ótedi. Keshtiń birinshi bóliminde qarasha aıynda premerasy ótken «Mahabbattyń ǵaıyp bolǵan darabozdary» («Love's Lost Idols») baleti qalyń kórermenniń suraýy boıynsha ekinshi márte kórsetilmek, dep habarlaıdy QazAqparat atalǵan teatrdyń baspasóz qyzmetine siltememen.
Kórermen qaýym zor qoshemetpen qabyldaǵan qoıylymda amerıkalyq horeograf Nıkolo Fonte adam balasyn atam zamannan mazalap kele jatqan: «Bári ótkinshi ekenin bile tura, qalaısha ǵashyq bolyp, qalaı ómir súrý múmkin?» degen suraqqa jaýap izdeıdi. Kórkem, keıde tipti, ekstremaldy bı tilimen teatr ártisteri «Senderge bar keregi - osy shaqta, dál osy jerde ómir súrý. Dál osy sátti sezinip, oǵan ǵashyq bolý. Artqa qaraılaı berý - bekershilik» dep turǵandaı.
«Astana Balet» teatrynyń shaqyrylǵan horeografy Rıkardo Amarante osy baletmeıstermen Eýropada jumys istegenin, onyń qoıylymdaryna degen kórermen qaýymnyń ynta-yqylasyna kýá bolǵanyn aıtqan edi. Qazaqstanda da, onyń qoıylymyna degen qoshemet erekshe boldy. Spektakldi tamashalaǵan jurtshylyq ártisterdi sahnadan jibermeı, balettiń jalǵasyn talap etkendeı boldy. «Astana Balet» teatry kórermen kóńilin jyqpady.
Keshtiń ekinshi bóliminde kórsetiletin taǵy bir emotsıonaldy ári qyzyqty qoıylym da kórermen yqylasyna bólengen, Lalo Shıfrın men Astora Pıatstsollonyń mýzykasyna Rıkardo Amarante qoıǵan «A FuegoLento». Premera 2016 jyldyń 5 qazanynda ótkenine qaramastan, áli kúnge deıin ózektiligin joǵaltpaǵan, qaıtalanbas plastıkalyq tili úshin synshylar tarapynan joǵary baǵasyn alǵan, teatr repertýaryn baıyta túsken týyndy.
«A fuegoLento» bozbala men boıjetken kóńil jarastyrǵan shaqta bólenetin sezim kúıin tanýǵa múmkindik beredi. Bul balet, adam balasynyń mahabbat sezimine alǵash elitken tustaǵy kúıin sıpattaıdy.
Qoıylymnyń emotsııalyq qýatyn arttyrý úshin baletmeıster brazılııalyq sambo bıiniń elementterin qoldanady. Teatr repertýaryndaǵy ózge spektaklderden osy týyndyny daralap turǵan da naq osy dúnıe.
Esterińizge sala keteıik, bıyl «Astana Balet» teatrynyń V mereıtoılyq maýsymynda da kórermen qaýymnyń kóńilin jadyratar tyń dúnıeler usynylmaqshy. Jaqyn aradaǵy premeraǵa daıyndyqty «Astana Balet» teatrynyń bas baletmeısteri Mýkaram Avahrı bastap ta ketti. Bul - «Beıbarys» baleti bolýy yqtımal.
Bas baletmeıster bizge bolashaq qoıylymnyń eki bólimnen turatynyn, sıýjeti berik ekenin aıtty. Munda kórkemdik jáne sahnalyq sheshimder teń dárejede qoldanylatyn eksperıment deýge de turarlyq eken. Premeranyń naqty qaı kúni ótetini áli belgisiz.
«Bul kınobalet bolady-aý dep oılaımyn. Menińshe, bizdiń teatrymyz úshin munyń ózi mol tájirıbe bolady. Negizgi maqsat - quldan ámirshige deıingi ómir jolyn júrip ótken tarıhı tulǵanyń ǵumyrnamasyn sahnaǵa shyǵaryp, kórermen nazaryna usyný», - deıdi Mýkaram Avahrı.
