Astanada zamanaýı balet baǵytyndaǵy biregeı spektakldiń tusaýy kesildi
Osydan eki apta buryn Astanada Ortalyq Azııa elderiniń halyqaralyq bı festıvali bastaldy.
Sharanyń maqsaty - álemdik juldyzdardyń sheberlik sabaqtary arqyly alys jáne jaqyn memlekettermen dostastyqty nyǵaıtý. Elordamyzdy Orta Azııanyń neoklassıkalyq jáne kontemporarı óneriniń astanasy ekendigin dáleldeý.
Amerıkalyq tanymal horeograf Pol Gordon Emersonnyń bastaýymen sheberlik sabaqtarǵa qatysqan jas juldyzdar «Falling Man» atty qoıylymyn usyndy.
Zamanaýı balet baǵytyndaǵy biregeı spektakldiń álemdik tusaýkeserin uıymdastyrýshylar elordamyz Astananyń 20 jyldyǵyna arnady.
«Falling Man» qoıylymynda neoklassıkalyq jáne kontemporarı, modern, brodveı, djaz, hıp-hop, sonymen qatar zamanaýı horeografııa ózara úılesim tapqan.
«Elbasynyń «Rýhanı jańǵyrý» baǵdarlamasy aıasynda kóptegen mádenı sharalar júzege asyrylýda, búgingi shara sonyń dáleli, bı óneri arqyly Ortalyq Azııa jastarynyń basyn qosyp, tamasha qoıylym qoıdy. Álemge tanymal óner maıtalmandarynyń elordamyzǵa kelip, óz tájirıbelerimen bólisýi, jas talanttardy ónerge baýlýy biz úshin istelinip jatqan jumystyń nátıjesi», - dedi QR Mádenıet jáne sport vıtse-mınıstri Aqtoty Raıymqulova.
Aıta keteıik, elimizde alǵash ret ótkizilgen festıvalǵa Túrikmenstan, Tájikstan, Qyrǵyzstan, Ózbekstan, Reseı jáne Qazaqstan eliniń talantty bıshileri men horeograftary jınaldy. Eki aptalyq sheberlik sabaqtaryn AQSh-tan kelgen Pılkıngton Ketrın, Del Fına syndy áıgili horeograftar júrgizdi. Horeografııanyń aldyńǵy qatarly sheberleri qatysýshylarǵa neoklassıkalyq balet, kontemporarı, modern, brodveı, djaz, hıp-hop, sonymen qatar horeografııanyń foto-vıdeo túsirilimi men art-menedjment taqyryptaryna arnaıy skıll-ap ótkizdi.
