Astanada zamanaýı ádebıettanýdyń teorııalyq máselelerine arnalǵan halyqaralyq konferentsııa ótti
ASTANA. KAZINFORM – L.N. Gýmılev atyndaǵy Eýrazııa ulttyq ýnıversıteti bazasynda belgili aqyn, ádebıettanýshy-ǵalym, Qazaqstan Respýblıkasynyń Eńbek sińirgen qaıratkeri Janat Áskerbekqyzy Aımuhambettiń 60 jyldyq mereıtoıyna arnalǵan «Zamanaýı ádebıettanýdyń teorııalyq máseleleri jáne strýktýralıstik-fenomenologııalyq zertteýler» atty halyqaralyq ǵylymı-praktıkalyq konferentsııa ótti.
Halyqaralyq deńgeıde uıymdastyrylǵan jıynnyń maqsaty – zamanaýı ádebıettaný ǵylymynyń ózekti teorııalyq máselelerin talqylaý, strýktýralıstik jáne fenomenologııalyq baǵyttaǵy zertteýlerdi júıeleý, sondaı-aq ǵalymnyń ǵylymı jáne shyǵarmashylyq murasyn jan-jaqty zerdeleý boldy.
Іs-shara barysynda mereıtoı ıesine arnalǵan beınebaıan kórsetilip, ǵylymı eńbekteriniń bıblıografııasy men konferentsııa materıaldary jınaǵy tanystyryldy. Sonymen qatar jańa kitaptardyń tusaýkeseri ótti.
Plenarlyq májilisti Májilis depýtaty, fılologııa ǵylymynyń doktory, professor Amanjol Áltaı júrgizdi. Alqaly jıynda Máýlen Áshimbaev, Erlan Qoshanov, Erlan Qarın, Saıasat Nurbek jáne ózge de memlekettik organdardyń, ǵylymı-zertteý ınstıtýttarynyń, joǵary oqý oryndarynyń basshylary men mádenıet jáne bilim salasynyń jetekshi ókilderiniń quttyqtaý sózderi oqyldy. Sondaı-aq atalǵan otyrysta otandyq jáne sheteldik jetekshi ǵalymdardyń baıandamalary tyńdalyp, ádebıettanýdyń qazirgi baǵyttary, poetıka, ulttyq ádebı úderis jáne pánaralyq zertteýler máseleleri keńinen talqylandy.
Jıyn barysynda belgili ǵalym Shákir Ibraev sóz sóılep, mereıtoı ıesiniń ǵylymı eńbekterine joǵary baǵa berdi. Onyń aıtýynsha, mıftiń mazmuny qazirgi adam sanasynyń tereń qabattarymen astasyp, tek áleýmettik astarmen shektelmeı, adam bolmysynyń qundylyqtyq, rýhanı qyrlaryn da qamtıdy.
– Mıf – jaı qaıtalanatyn daıyn motıv emes. Ol – aqynnyń oıy men sezim dúnıesiniń jańa órisin ashatyn, syrly álemge aınalǵan kúrdeli qubylys. Qazirgi ádebıette mıf fenomenologııalyq turǵydan jańasha transformatsııaǵa túsip, adam tanymynyń tereń qatparlaryn aıqyndaıdy. Bul úderis Janat Áskerbekqyzynyń ǵylymı izdenisi men kórkem shyǵarmashylyǵynda aıqyn kórinis tabady, - dedi ǵalym.
Sonymen qatar ol ádebı-kórkem shyǵarmalardaǵy mıf pen psıhologııalyq qubylystardyń ózara baılanysyna toqtalyp, syrtqy qurylymy mıfke uqsas bolǵanymen, olardyń mazmuny búgingi qoǵam shyndyǵyn, zamanaýı adam bolmysynyń erekshelikterin beıneleıtinin atap ótti.
Halyqaralyq ǵylymı-praktıkalyq konferentsııaǵa Qazaqstan jáne shetel memleketterinen kelgen ǵalymdar, joǵary oqý oryndarynyń oqytýshylary, jas zertteýshiler jáne ádebıet salasynyń mamandary qatysyp, ǵylymı tájirıbe almasýǵa, halyqaralyq yntymaqtastyqty damytýǵa jáne ulttyq ádebıettanýdyń jańa baǵyttaryn aıqyndaýǵa múmkindik aldy.
Aıta keteıik, osyǵan deıin Qasym-Jomart Toqaev ǵylymǵa kórsetilip jatqan júıeli qoldaý sharalaryna toqtaldy.
