Astanada zaǵıp balalarǵa arnalǵan kórme ashyldy
ASTANA. QazAqparat - QR Ulttyq mýzeıinde zaǵıp jáne nashar kóretin balalarǵa arnalǵan «Kóktem sımfonııasy» kórmesi uıymdastyryldy, dep habarlaıdy QazAqparat tilshisi.
Kórmeniń basty ereksheligi - balalar músinderdi qolmen ustap, sezine alady jáne onda Braıl áripterimen túsindirme jazylǵan.
«Ádette, mýzeı eksponattaryn qolmen ustaýǵa rusqat bermeıdi. Al zaǵıp balalar barlyq nárseni qolmen ustaý arqyly «kóredi». Naýryz meıramy qarsańynda búgin otandyq músinshilerdiń týyndylarymen tanysyp, qandaı materıaldarmen jasalǵanyn kóremiz. Braıl áripterimen jazylǵan túsindirmelerdi oqımyz. Osylaısha, balalardy ónerge bir qadam jaqyndatqymyz keledi. Olar da qatarlastary sekildi mýzeıge, kontsertke barǵandy unatady, bárin kórip-bilgisi keledi. Sondyqtan, mundaı sharalardy jıi uıymdastyrýǵa tyrysamyz», - dedi Astana qalasynyń №10 mektep-gımnazııasynyń muǵalimi, tıflopedagog Sáýle Saǵymbaeva.
Onyń aıtýynsha, №10 mektep-gımnazııa - elordada zaǵıp balalarǵa bilim beretin jalǵyz mektep. Munda arnaıy synyptar ashylǵan. Onda 14 zaǵıp jáne 172 nashar kóretin bala oqıdy.
Kórmege Marat Ǵabdrahmanovtyń «Jaýynger» músini, Valerıı Pırojkovtyń «Búrkitshi», Anatolıı Posıadonyń «Tabynda», Ashat Dinekeevtiń «Áýen», Rysbek Ahmetovtiń «Nemere» músinderi qoıyldy. Sonymen birge, №10 mektep-gımnazııanyń oqýshylary jasaǵan buıymdar usynylǵan. 
Budan bólek, balalar óleń oqyp, án shyrqap, óz ónerlerin kórsetti jáne Naýryz meıramynyń qurmetine mýzeıdiń syı-sııapattarymen marapattaldy.
