Astanada ysyrýǵa jatatyn qurylystar baǵasynyń artýynan qarajattar jetispeýde - ákimniń jeke blogynan
ASTANA. 13 maýsym. QazAqparat - Astanada ysyrýǵa jatatyn qurylystar baǵasynyń artýynan qarajattar jetispeýde.
Bul týraly qala ákimi Imanǵalı Tasmaǵambetovtyń óziniń jeke blogynda turǵyndardyń birine bergen jaýabynan belgili boldy.
Elordalyq turǵyn qala basshysyna kólik jolynyń sapasyzdyǵyna shaǵymdanǵan. «Saryarqa kóshesinen Jangeldın kóshesindegi №60 lıtseıge qaraı burylatyn joldy neǵurlym tegisteýge bolmas pa eken?!. Óıtkeni onda ótken jyldan beri dál baǵdarshamnyń tusynda eńis jer bar. Sonyń kesirinen keptelister paıda bolady, sebebi odan asa tómen jyldamdyqpen ótý kerek», - degen ol.
Óz kezeginde I.Tasmaǵambetov: «Injenerlik jelilerdi qurý jáne Kenesary-Kúmisbekov-Bógenbaı-Saryarqa kósheleriniń aýmaǵynda joldy salý boıynsha jobanyń júzege asyrylýy aıasynda ysyrýǵa jatatyn qurylystar baǵasynyń artýynan qarajattardyń jetispeýshiliginen, biz Saryarqa dańǵylynan Kúmisbekov kóshesine deıingi Jangeldın kóshesin tek 80 paıyzǵa ǵana qaıta jóndeı aldyq. Asfaltty-betondy jabyndy tek bir qabatpen tóseldi, Saryarqa dańǵyly men Jangeldın kóshesiniń qıylysynda tabaldyryqtyń paıda bolýy osymen baılanysty. Qazirgi ýaqytta biz atalmysh jobany aǵymdaǵy jyly aıaqtaý úshin qajetti qosymsha qarajatty izdep-tabýmen aınalysýdamyz», - dep jaýap qaıyrdy.
