Astanada ys pen tútinnen qorǵaıtyn qurylǵylar qansha úıge ornatylady
«Qazirgi ýaqytta 100-den astam úıdi qamtýdy josparlap otyrmyz. Aldyn ala esep boıynsha, osyndaı shaǵyn qurylys nysandary 400-den asady. Olar tek Saryarqa aýdanynda ǵana emes, sonymen qatar Kóktal-1 men Kóktal-2, Agroqalashyq jáne jaqyn mańda ornalasqan ózge de aýmaqtar josparǵa kirip otyr», - dedi atalǵan aktsııanyń bastamashysy Arman Qashqynbekov QazAqparat tilshisine bergen jaýabynda.
Belgili bolǵandaı, aktsııa 8 aqpan kúni bastaldy.
«Keshe keshqurym datchıkti tek bir úıge ǵana ornatyp úlgerdik. Bul jumystar keshke qaraı bastalǵandyqtan, bir úı ǵana qamtyldy. Búgin tańerteńnen jumystardy jalǵastyryp jatyrmyz. 9 aqpanda shamamen 10 úıdi qamtýdy josparǵa engizdik», - dedi ol.
Bul ıgilikti sharanyń bastamashylary kútpegen problemaǵa tap bolǵan.
«Biz elorda dúkenderinde bolǵan barlyq qurylǵyny satyp aldyq. Endi biz qajetti kólemdegi datchıkterdi taba almaı otyrmyz. Satýshylardyń aıtýynsha, olar Almatyda da joq eken. Ony tek Novosibirden aldyrý kerek. Qazir endi qurylǵylardy Astanaǵa jetkizý amaldaryn oılastyryp jatyrmyz. Degenmen, jospar boıynsha 100 úıdi qamtýǵa tyrysamyz. Múmkin bolsa, odan kóp úıge ornatý nıetimiz bar», - deıdi Arman Qashqynbekov.
Onyń sózine qaraǵanda, datchık ornatý sharalaryn aldaǵy aptada tolyq aıaqtaý kózdelip otyr. Bul jobanyń maqsaty - úılerdi órtten qorǵaýdyń ońtaıly tásilderin kórsetý. Búginde tútin datchıgi 1,8 myń teńge, gazǵa taldaý jasaý qurylǵysy 5 myń teńge turady.
«Bizdiń qanatqaqty jobamyzǵa basqa da bıznesmender qoldaý jasap jatqanyn estip jatyrmyz. Búginde olar óz óńirlerinde osyndaı sharalardy júrgizýge nıetti, sebebi ol aıtarlyqtaı qıyn jumys emes. Atap aıtsaq, qyzmet etip júrgen keńselerimizde datchıkter ornatylǵan jáne biz olarǵa nazar aýdaryp júrgen joqpyz», - dedi ol.
Esterińizge sala keteıik, Djentelmender klýbyndaǵy Arman Qashqynbekov pen Sanjardyń demeýshilik kómegimen kópbalaly otbasylardyń, aýdandaǵy jeke sektorda turatyn áleýmettik az qamtylǵan otbasylardyń úıine ys pen tútinnen qorǵaıtyn qurylǵy ornatyla bastaǵan bolatyn.