Astanada «WorldSkills Kazakhstan 2023» konkýrsynyń jeńimpazdary marapattaldy
Astanadaǵy Beıbitshilik jáne kelisim saraıynda «WorldSkills Kazakhstan 2023» konkýrsynyń jeńimpazdary marapattaldy, dep habarlaıdy Kazinform agenttigi.
Zamanaýaı jumysshy mamandyqtardyń halyqaralyq standartyn qalyptastyrýǵa baǵyttalǵan WorldSkills qozǵalysynyń Qazaqstannyń eńbek naryǵyna engenine de birneshe jyl boldy. Bıylǵy respýblıkalyq konkýrstyń jeńimpazdary eki jylda bir ret ótetin álem chempıonatyna qatysýǵa múmkindik alyp otyr. Ol úshin byltyrǵy jeńimpazdarmen ózara myqtyny anyqtaý kerek. Al byltyrǵy jeńimpazdar Eýropa chempıonatynda baq synap, tájirıbe jınaqtaǵan bolatyn.
Marapattaý sharasyna Oqý-aǵartý mınıstri Ǵanı Beısembaev qatysty.
«Bul jarystyń eń úlken eki nátıjesi mynada. Birinshi kezekte, jastar jarysta jeńimpaz atanyp qana qoımaı, jumys berýshilerdiń kózine túsedi. Osy turǵydan alǵanda bul búkil qatysýshylar úshin úlken múmkindik. Ekinshiden, osy jarysta jeńimpaz atanǵan jastar kelesi jyly Frantsııada ótetin álem chempıonatyna joldama alady. Sondyqtan bul jumysshy mamandyqtaryn ıgerip jatqan balalarymyzdyń baǵyn ashatyn eń aýqymdy is-shara. Biraz jumys berýshi bolashaq qyzmetkerlerin izdep osy jarysqa bas suǵyp jatyr», - deıdi mınıstr.
Jarys qorytyndysy boıynsha 30 túrli mamandyq ıesiniń jeńimpazdary men júldegerleri anyqtalyp jatyr. Solardyń ishinde nátıjesi birinshi bolyp anyqtalǵan birneshe jeńimpazdy áńgimege tartyp kórdik.
«Jambyl oblysynan jeńimpaz atanyp, osy jarysqa kelgenmin. Bul jerde de «Kólik shanaǵyn jóndeý» nomınatsııasy boıynsha birinshi oryn aldym. Jarys óte joǵary deńgeıde ótti. Qoldanýǵa bergen qurylǵylar óte zamanaýı boldy. Sarapshylar da myqty eken. Jarysqa 2-3 aıdaı ǵana daıyndaldym. Óıtkeni dál jarysqa daıyndalar kezde óz kóligimdi soǵyp alǵan edim. Arasynda sony jóndeý kerek boldy. Qysqasy, jarysqa daıyndyǵymdy óz kóligimdi jóndeý júrip shyńdadym», - deıdi Raýan Tasý atty stýdent.
Onyń atalymyndaǵylar birneshe modýl boıynsha synǵa túsken.
«Onyń ishinde shanaqtyń maıysqan tusyn qaıta boıamastan tegisteý, «Lada 2114» shanaq televızoryn dánekerleý sııaqty tapsyrmalar boldy. Sondaı-aq, shpateldeý, ysqylaý, dánekerleý sapasy eskerildi. Sonymen birge sý jańa «Hyundai» kóligi shanaǵynyń geometrııasyn anyqtadyq. Osy tapsyrmalardyń oryndalý deńgeıine qaraı qabiletimizdi saraptady. Endi ári qaraı ınjener-mehanık mamandyǵy boıynsha joǵary bilim alǵym keledi. Odan keıin óz bıznesimdi ashatyn shyǵarmyn. Qalaı bolǵanda da shanaq jóndeý mamandyǵyn jalǵastyram», - deıdi jarys jeńimpazy.
Al Jaqsylyq Baısherıev Shymkent qalasy ındýstrııalyq-tehnıkalyq kolledj atynan baq synaı kelipti.
«Bizdiń atalym boıynsha 20 bala qatysty. Eldegi 20 óńir men qalanyń jeńimpazdary ǵoı bári. Bizdi 4 modýl boıynsha baǵalady. Tórt modýldiń bári qıyn boldy. Qarapaıym tilmen aıtsaq, dánekerdiń 6 túrin istep kórsettik. Mysaly, jartylaı avtomatty túrde, argonmen dánekerleý jáne qara temirdi dánekerleý sııaqty túrlerin kórsettik. Elektrondy doǵa deımiz, qolmen dánekerleý de boldy. Búgin jarys qorytyndysyn estip, kádimgideı tańǵaldym. Naǵashy aǵam dánekerleýshi edi. Sonyń qasynda júrip men de osy jumysqa beıimdelip kettim. Ári qaraı da osy mamandyqty tolyq ıgerip, jumys isteıtin shyǵarmyn», - deıdi ol.
Almaty servıstik qyzmet kórsetý kolledjiniń stýdenti Álmıra Esenbaı bul jarysta «merchandaızıng» atalymy boıynsha úshinshi oryn aldy.
«Bul ózi marketologııanyń bir salasy deýge bolady. Qazir osy marketolog mamandyǵy boıynsha ekinshi kýrsta oqyp jatyrmyn. Taýardyń ótimdi bolýy sórede qalaı turǵanyna da baılanysty. Merchandaızıng osy turǵydan mańyzdy ári qyzyqty. Jarysta aǵashty ózimiz kesip, sórege paıdalandyq. Maǵan sol jaǵy qıyndaý boldy. Jalpy merchandaızıng mamandyǵyna suranys artyp keledi. Buǵan deıin bir adam men jumysqa shaqyrǵan bolatyn. Eń bastysy onyń qajetti mamandyq ekenin jumys berýshiler jaqsy biledi», - deıdi bolashaq marketolog.
