Astanada «WorldSkills Kazakhstan - 2017» jas mamandar chempıonaty bastaldy
ASTANA. QazAqparat - Astanada elimizdiń úzdik jumysshy mamanyn anyqtaıtyn dástúrli «WorldSkills Kazakhstan - 2017» Ulttyq chempıonatynyń resmı ashylý saltanaty ótti. Onda elimizdiń túpkir-túpkirinen jınalǵan 400-den astam jas maman synǵa túsedi, dep habarlaıdy «QazAqparat» HAA tilshisi.
«Worldskills Kazaqstan» jobasy bıyl úshinshi ret ótkizilip otyr. Jarys jeńimpazdary 2017 jyldyń mamyr aıynda Krasnodar qalasynda ótkiziletin Reseıdiń «Jas mamandar» (WorldSkills Russia) Ulttyq chempıonatyna qatysady. Sondaı-aq, WorldSkills Kazakhstan Ulttyq qurama komandasy qazan aıynda Ábý -Dabı qalasynda (BAÁ) ótetin WorldSkills Competition álemdik chempıonatyna qatysady.
«Bıylǵy chempıonattyń bir ereksheligi, Qazaqstan TMD elderiniń ókilderiniń jáne múmkindigi shekteýli jandardyń saıysqa qatysýyna ruqsat etti. Qazaqstan Respýblıkasy múgedekterdi kásiptik baǵdaryna jáne jumysqa ornalasýyna járdem beretin «Abılımpıks» uıymymen jáne Deafskills halyqaralyq qaýymdastyǵymen yntymaqtastyq ornatty. «WORLDSKILLS» qozǵalysy respýblıkada keńinen tanylyp keledi. Bıyl elimizdiń barlyq óńirinen 400 qatysýshy baq synaıdy jáne bıznes salasynan 500 sarapshy, 5 myńnan astam mektep oqýshylary, kolledj ben JOO stýdentteri shaqyryldy. Sizderdiń daıyndyqtaryńyz, tereń bilimderińiz jáne shyǵarmashylyq qabiletterińiz joǵary nátıjege qol jetkizýge, ustazdaryńyzdyń senimin aqtaýǵa septigin tıgizerine senimdimin», - dep lebiz bildirdi QR Bilim jáne ǵylym vıtse-mınıstri E.A. Sýhanberdıeva.
2-5 mamyr kúnderi óńirlik jarystardyń jeńimpazdary ózara baq synasyp, mehatronıka, ınjenerlik grafıka (avtomatty jobalaýdyń júıesi), dánekerleý tehnologııasy, santehnıka jáne jylytý, elektronıka, veb-dızaın, elektromontaj, kirpish qalaý, qurǵaq qurylys pen sylaq jumystary, sylaý jáne dekoratıvti jumystar, shashtaraz óneri, kıim dızaıny jáne úlgileý, meıramhana servısi, sýytý jáne jeldetý tehnıkalaryna qyzmet kórsetý, jelilik jáne júıelik basqarý, grafıkalyq dızaın, nan pisirý sheberi, dánekerleý isi, júk avtokólikterine qyzmet kórsetý, kýzovty jóndeý jumystary, plıtkamen qaptaý, sandyq baǵdarlamaly basqarýy bar bildektegi tokar jumystary, aǵash sheberiniń isi, aǵash ustasynyń isi, aspaz isi, landshaft dızaıny, shatyr jumystary (prezentatsııalyq nusqada), jeńil avtokólikke qyzmet kórsetý jáne jóndeý, vızýaldy merchendaızıng jáne vıtrınıstıka boıynsha synǵa túsedi.
Sondaı-aq, bul kúnderi Astana qalasyndaǵy «Kórme» ortalyǵynda alǵash ret «WorldSkills Kazakhstan-2017» Ulttyq chempıonaty aıasynda múmkindikteri shekteýli Abilympics (Abılımpıks) jáne estý qabileti nashar Deafskills oqýshylary arasynda kásibı sheberlik saıystary ótedi.
Eske sala ketsek, Qazaqstan WorldSkills qaýymdastyǵynyń quramyna 2014 jyly 70-shi qatysýshy memleket bolyp tirkeldi. Qazirgi ýaqytta WorldSkills 76 memlekette qoldaý taýyp otyr. QR Memlekettik hatshysy Gúlshara Ábdiqalyqova Qazaqstannyń jumys berýshi kompanııalaryn WorldSkills qozǵalysyna qoldaý kórsetýgeshaqyrǵan edi.
