Astanada volonterlerdi oqytatyn 17 jańa trener daıyndalyp jatyr
ASTANA. KAZINFORM — Astanada volonterlik boıynsha bilikti mamandardy daıarlaýǵa baǵyttalǵan «Trenerlerge arnalǵan trenıng» baǵdarlamasynyń tereńdetilgen kýrsy bastaldy. Bıylǵy lekke 17 adam qatysyp jatyr. Bul týraly Mádenıet jáne aqparat mınıstrligi málim etti.
Baǵdarlamany Qazaqstan Respýblıkasy Mádenıet jáne aqparat mınıstrligi Ulttyq volonterlik jelimen birlesip, strategııalyq áriptestik jobasy aıasynda júrgizip keledi.
2026 jyly bul baǵdarlamanyń máni aıryqsha. Memleket basshysy Qasym-Jomart Toqaevtyń bastamasymen BUU Bas Assambleıasy osy jyldy Turaqty damý maqsatyndaǵy Halyqaralyq volonterler jyly dep jarııalaǵan bolatyn.
— «Trenerlerge arnalǵan trenıng» volonterlik qozǵalysqa qajetti bilikti mamandardy daıarlap, volonterlik bastamalarǵa kórsetiletin ádistemelik qoldaýdyń sapasyn arttyrýdy kózdeıdi, — delingen habarlamada.
Vedomstvonyń dereginshe, keıingi úsh jylda baǵdarlamanyń bazalyq kýrsynan 140 trener ótti. Onyń ishinde 2024 jyly 42, 2025 jyly 47, al 2026 jyly 51 adam bilim aldy. Tereńdetilgen kýrs boıynsha eki jyl ishinde 33 maman daıarlanady.
Oqý barysynda qatysýshylar teorııalyq bilimmen qatar, volonterlik qaýymdastyqtarmen jumys isteýge qajetti tájirıbelik daǵdylardy meńgeredi. Keıin olar alǵan bilimi men tájirıbesin óńirlerdegi volonterler men uıymdarǵa arnalǵan semınarlar men ózge de jıyndarynda ortaǵa salady.
2025 jyly tereńdetilgen kýrsqa qatysýshylar 80-nen astam semınar ótkizdi. Bıyl elimizdiń óńirlerinde taǵy keminde 85 oqytý sharasyn uıymdastyrý josparlanyp otyr.
Buǵan deıin elimizde volonterlik tájirıbe eńbek ótiline eseptelýi múmkin ekenin jazdyq.
