Astanada volonter, bloger men jýrnalıster «Halyq alǵysy» medalimen marapattaldy

NUR-SULTAN. QazAqparat - Búgin Aqparat jáne qoǵamdyq damý mınıstri Aıda Balaeva Memleket basshysy atynan belsendi volonterler, metsenattar, blogerler men jýrnalısterdi pandemııamen kúreste qosqan úlesteri úshin «Halyq alǵysy» medalimen marapattady, dep habarlaıdy QazAqparat tilshisi.

Aıda Balaeva «Birgemiz» respýblıkalyq aktsııasy aıasynda COVID-19 taralýyna qarsy is-sharalarǵa qatysqan azamattardyń úlesin atap ótip, el ómirindegi qıyn-qystaý kezeńde úzdikter qatarynan tabylǵandary úshin alǵys bildirdi.

«Syn saǵattarda qıyndyqqa moıynsunbaı, ózderińizdiń azamattyq ustanymdaryńyzdy kórsetý arqyly, ultjandylyq tanyta bilgen Sizder elimizdiń maqtanyshysyzdar. Prezıdent qaıyrymdylyq jáne volonterlik uıymdary ókilderimen ótken onlaın kezdesýde volonterlik qozǵalystyń jalpy ulttyq masshtabqa ıe bolyp, azamattardyń kómek qolyn sozýǵa degen belsendi ustanymy áleýmettik normaǵa aınalyp bara jatqanyn atap ótti»,-dedi A.Balaeva.

«Halyq alǵysy» medalimen marapattalǵan jýrnalıst jáne telejúrgizýshi Dınara Sátjan: «Maǵan keıinnen bireý alǵys aıtady dep oılamadym. Ol ýaqytta tek adamdarǵa qalaı kómek bersek degen oı ǵana boldy», - dedi.

Sondaı-aq Qazaqstan musylmandary dinı basqarmasynyń ortalyq apparatynyń basshysy Ǵylymbek Májıev pandemııanyń taralýymen kúres kezinde din qyzmetkerleriniń mańyzdy rólin atap ótip, memleket tarapynan kórsetilgen qoldaý úshin rızashylyǵyn bildirdi.

Aıta keteıik, QR Prezıdentiniń 2020 jylǵy 14 qyrkúıektegi Jarlyǵymen bilim, densaýlyq saqtaý, áleýmettik qorǵaý salalarynda jemisti eńbek etip júrgen, sondaı-aq koronavırýs pandemııasymen kúreste erekshe kózge túsken 5 myńnan astam azamat «Halyq alǵysy» medalimen marapattaldy.

2020 jylǵy 30 qyrkúıekte qaıyrymdylyq jáne volonterlik uıymdary ókilderimen ótken onlaın kezdesýde Prezıdent respýblıka kóleminde marapattardy óz ıelerine tabystaýdy tapsyrdy.

Búgingi sharada medaldar D.Abdınge, A.Agıbaevaǵa, B.Bekkojınaǵa, M.Bektazınovke, A.Vlasenkoǵa, A.Gazalıevke, A.Gaısınaǵa, A.Gorbachevaǵa, G.Majıevke, D.Satjanǵa, R.Tıdege, Z.Shalabaevaǵa, M.Bazarbaevqa, E.Kochetovke, A.Shaǵalaqovqa tabys etildi.