Astanada vıtamın satamyn dep adamdardy aldap, qyrýar qarjy tapqan pıramıda anyqtaldy

ASTANA. KAZINFORM – Qarjylyq monıtorıng agenttigi Astana qalasy boıynsha departamenti «Happy Life KZ» qarjylyq pıramıdanyń áreketin toqtatty.  

Kúdikti 2016 jyldan 2024 jylǵa deıin bıologııalyq belsendi qospalardy satamyn degen jeleýmen salymshylardy tartyp, olarǵa ár jańa qatysýshy úshin 10%-dan 300%-ǵa deıin tabys ýáde etkeni anyqtaldy.

Salym somasy marketıngtik strategııaǵa baılanysty 7 500-den 2 mıllıon teńgege deıin ózgerip otyrǵan. Tartylǵan qarajattyń jalpy somasy 286 mıllıon teńgeden asqan. Nátıjesinde kúdikti qarjylyq pıramıdaǵa 35 adamdy tartqan.

Barlyq zardap shekkender – jeńil tabys týraly qurǵaq ýádege senip qalǵan zeınetkerler ekenin atap ótý kerek, olar óz jınaqtarynyń basqa salymshylar arasynda aqsha bólý shemasynyń bir bóligine aınalatynyn sezbegen.

Qarjylyq tergeý júrgizý barysynda kúdikti zańsyz jolmen alynǵan qarajatqa elıtalyq turǵyn úı kesheninen 36 mıllıon teńge turatyn páter satyp alǵany anyqtaldy. Sottyń sanktsııasymen atalǵan páterge tyıym salyndy. Sot kúdiktige «eshqaıda ketpeý jáne tıisti minez-qulqy týraly qolhat» túrindegi bultartpaý sharasyn tańdady. Sotqa deıingi tergeý jalǵasyp jatyr.

QR QІJK-niń 201-baby boıynsha, tergeý múddesi úshin ózge aqparat jarııalaýǵa jatpaıdy.

Aıta keteıik, Agenttikte qarjy pıramıdalarynyń belgilerin tekserýge múmkindik beretin «Baiqa, piramida!» Telegram-boty iske qosýly.

– Eger Siz nemese jaqyndaryńyz qarjy pıramıdasynyń áreketine tap bolsa, turǵylyqty jerińiz boıynsha Ekonomıkalyq tergep-tekserý departamentine júginýdi suraımyz. Azamattardy saq bolýǵa jáne kúmándi qarjylyq uıymdarǵa jınaqtaryn salmaýǵa shaqyramyz, - delingen habarlamada.

Bas prokýratýra qarjy pıramıdasyn qurǵandar eldi qalaı arbaıtynyn aıtqan bolatyn.