Astanada «vırtýaldy bala kútýshisi» paıda boldy
ASTANA. QazAqparat - Astanada «vırtýaldy bala kútýshisi» qyzmeti paıda boldy. Ǵalamtor mamandary azdaǵan aqsha úshin áleýmettik jeli arqyly balany baǵyp berýge daıyn, dep jazady express-k.kz.
Qazirgi kezde balalardyń kópshiligi shynaıy qarym-qatynastan góri vırtýaldy qarym-qatynasty qalaıtyny jasyryn emes. Kompıýterler men túrli gadjetter balany qyzyqtyratyny sonshalyq, olar táýlik boıy ǵalamtordan shyqpaýǵa deıin barady. Al ata-analary bolsa, osy ýaqytta balalarynyń nemen aınalysyp otyrǵanynan beıhabar.
«Balany senimsiz saıttardan qorǵap, oǵan kirýge múmkindik bermeıtin arnaıy baǵdarlamalar bar, - deıdi «vırtýaldy bala kútýshisi», programmıst Artem Shtern. - «Vırtýaldy bala kútýshisi» qyzmeti arqyly maman balanyń otyrǵan qurylǵysynan, uıaly telefon, kompıýter, planshet bolsyn, ol alyp jatqan aqparattar aǵynyn alystan baqylaı alady».
Artemniń aıtýynsha, bundaı baqylaý túri zańdy bolyp keledi, sebebi ata-anamen tıisti kelisimshart jasalady. Sondaı-aq, balanyń kirgen jelisine shekteý qoıa almaıdy, alaıda balany tártipke shaqyratyn aqyl-keńes jazyp jibere alady.
«Jazǵy ýaqytta bul qyzmetke suranys artady, bizde tek úsh maman ǵana jumys jasaıdy. Bastapqy ýaqytta buny qosymsha tabys kózi retinde qaraǵan edik, endi negizgi jumys dep qaraýǵa týra keldi», - deıdi A. Shtern.
