Astanada VІІІ Halyqaralyq jas tilshiler medıafestıvali ótýde
ASTANA. 16 naýryz. QazAqparat - Astana qalasynda «Juldyz» jastar qoǵamdyq uıymy odaǵynyń uıymdastyrýymen «Balalardyń aqparattyq keńistigi: kásibı is, shyǵarmashylyq, qarjylar» taqyrybynda «Baqytty juldyz astynda» atty VІІІ Halyqaralyq jas tilshiler medıafestıvali bastaldy.
Bul týraly atalǵan odaqtyń baspasóz qyzmetinen habarlandy.
Sharaǵa jas tilshiler, fototilshiler, TMD men Qazaqstannyń balalar men jastar BAQ jetekshileri, sala mamandary, oqytýshylar men psıhologtar, barlyǵy 150-den astam adam qatysýda. Halyqaralyq jas tilshiler medıafestıvaliniń maqsaty - Elbasy Joldaýyndaǵy jastar máselesi, elimizdegi jastar saıasatyn belsendi nasıhattaý baǵytynda jastardyń BAQ qyzmetterine qatysýyn arttyrý bolyp tabylady. Osyǵan oraı, baǵdarlama barysynda forýmǵa qatysýshylardyń «Memleket jáne qoǵamnyń ómirinde balalardyń aqparattyq keńistigi» atty kórmeniń tusaýy kesilip, «XXІ ǵasyrdaǵy Qazaqstan Respýblıkasynyń áleýmettik bastamalary jáne olardy aqparattyq qamtamasyz etý» atty taqyrypta «dóńgelek ústel» ótetini josparlanǵan. Budan bólek, jastardyń medıakeńistiktegi yqpaldastyq máseleleri, jastar shyǵarmashylyǵyn shyńdaý baǵytynda túrli sharalar uıymdastyrylatyn bolady.
Medıafestıval úsh kúnge ulasady.
