Astanada vıdeorolıkter baıqaýynyń jeńimpazdary marapattaldy

Astanada ulttyq qundylyqtardy nasıhattaýǵa jáne ekstremızm men terrorızm ıdeologııasynyń aldyn alýǵa baǵyttalǵan vıdeorolıkter baıqaýynyń jeńimpazdaryn marapattaý rásimi ótti, dep habarlaıdy Kazinform elorda ákimdiginiń resmı saıtyna silteme jasap. 

Іs-shara Respýblıka kúnin merekeleý aıasynda uıymdastyryldy.

«Búgin elordanyń 25 jyldyǵy men Respýblıka kúni merekesine oraılastyrylǵan baıqaý júldegerlerin marapattaý rásimi ótti. Bul baıqaýdyń maqsaty – destrýktıvti ıdeologııalarǵa qarsy ımmýnıtetti qalyptastyrý jáne shyǵarmashylyq pen ıdeıalar arqyly halyqtyń dinı saýattylyǵyn arttyrý. Qatysýshylar túrli dinı taqyrypta óz jumysyn usyndy. Júldeli oryndardyń ıegerleri qazylar alqasynyń sheshimimen olardyń konkýrs taqyrybyna sáıkestigin jáne uzaqtyǵy keminde 30 sekýndty eskere otyryp anyqtaldy», – dedi «Dinderdi zertteý ortalyǵynyń» dırektory Almas Ernazarov.

Marapattaý rásimi «Januıa» otbasy ınstıtýtyn qoldaý ortalyǵynda ótti. Qazylar alqasynyń sheshimi boıynsha júlde ıeleri tómendegideı:

1-oryn: Dıas Balmaǵambetov, 1 000 000 teńge somasyna sertıfıkat ıegeri atandy;
2-oryn: Nuraly Estaev, 500 000 teńge somasyna sertıfıkat;
3-oryn: Іlııas Baımoldın, 250 000 teńge somasyna sertıfıkat aldy.

Sonymen qatar 2 qatysýshy 10 000 teńge kóleminde jubanysh retinde aqshalaı sertıfıkattarmen marapattaldy.