Astanada vıdeokamera ornatý úshin jıi quqyq buzylatyn aýlalar anyqtalyp jatyr
ASTANA. QazAqparat - Elordada vıdeokameralardy ornatý úshin «problemalyq» aýlalar anyqtalý ústinde. Bul týraly «Kórkem telekom» JShS dırektory Áset Ahmetov aıtty, dep habarlaıdy «QazAqparat» HAA tilshisi.
Onyń aıtýynsha, el astanasynda barlyq beınebaqylaý kameralaryn biryńǵaı ortalyqqa beıimdeý jumystary áli de jalǵasýda.
«Jańa kameralarmen birge burynnan beri vıdeokamera ornalastyrylǵan oryndar bar. Olardyń qataryna áýejaı, vokzal, temir jol vokzalyn jatqyzýǵa bolady. Demek, osy oryndardaǵy kameralardy ıntegratsııalap, barlyq beınebaqylaý sıtýatsııalyq ortalyqqa toptastyrylyp jatyr. Osynda otyryp, qalanyń kez kelgen núktesinde bolyp jatqan jaǵdaıǵa baılanysty sharalardy qabyldaýǵa bolady», - dedi Áset Ahmetov tilshilerge bergen suhbatynda.
Onyń aıtýynsha, qazirgi ýaqytta aýla kameralaryn beınebaqylaý kameralarymen qamtý jumysy júrgizilýde.
«Sonymen birge, aýlalar da jaraqtandyrylýda. Bizdiń qolymyzda «problemalyq» aýlalarǵa baılanysty qazirgi ýaqytta statıstıkalyq málimetter bar. Demek, jıi quqyq buzylatyn aýlalarǵa beınebaqylaý kameralaryn ornatý jumystary júrgiziledi», - dedi Áset Ahmetov.
Aıta ketsek, buǵan deıin 2017 jyldyń jeltoqsan aıynda qala boıynsha 13 myń kamera ornatylatyny habarlanǵan edi.
Jalpy, qala ishinde 18 myń kamera ornatý kózdelip otyr. Osy jumys úshin 8 mlrd teńge jumsalmaq. Alaıda beınebaqylaýdyń jańa júıesi úshin bıýdjetten aqsha bólinbeıdi. Joba memlekettik-jekeshelik áriptestik aıasynda iske asyrylmaq.
